上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
36
巴錄佇聖殿宣讀冊卷
約西亞的子約雅敬統治猶大第四年，上主對耶利米講：
2 「你提一卷冊來，將約西亞作王的時到今仔日，我對你講所有有關以色列及猶大，以及列國的話，攏記錄起來。
3 猶大家聽著我欲降災禍互𪜶，𪜶逐個人有可能會悔改，無閣行邪惡的路，按呢我就會赦免𪜶的罪孽及罪惡。」
4 耶利米叫尼利亞的子巴錄來，將上主對伊所講一切的話給巴錄講，巴錄就將諸個話攏記錄佇冊卷。
5 耶利米吩咐巴錄，講：「我互人禁止，𣍐用得入去上主的聖殿，
6 所以你著佇禁食的日入去上主的殿，將我給你講，你寫佇冊卷上主的話，讀互人民及對逐個城鎮來的猶大人聽。
7 𪜶有可能會佇上主的面前祈禱悔改，逐個人無閣行邪惡的路，因為上主有講，伊對此個民族發的受氣非常猛烈。」
8 尼利亞的子巴錄就照先知耶利米所吩咐一切的話，佇上主的聖殿宣讀冊卷所記載上主的話。
9 約西亞的子約雅敬作猶大王第五年九月，住佇耶路撒冷的人及所有對猶大逐城鎮來耶路撒冷的人民，佇上主的面前遵守禁食。
10 彼時，巴錄佇上主聖殿的頂面埕，倚近聖殿新門門口，沙番的子書記基瑪利雅的房間，宣讀冊卷內面耶利米的話互所有的人民聽。
對官員宣讀冊卷
11 沙番的孫，基瑪利雅的子米該雅聽著冊卷所記載上主的話，
12 就去王宮，入去宮殿書記的房間。彼時，真多官員已經坐佇遐，包括書記官以利沙瑪、示瑪雅的子第來雅、亞革波的子以利拿單、沙番的子基瑪利雅、哈拿尼雅的子西底家，以及其他的官員。
13 米該雅將伊所聽著，巴錄對所有人民宣讀彼個冊卷的話，攏給𪜶講。
14 𪜶就派古示的乾仔孫，示利米雅的孫，尼探雅的子猶底去巴錄遐，叫伊親身給彼卷冊帶來。尼利亞的子巴錄就提冊卷去𪜶遐。
15 𪜶給伊講：「請坐。請讀互阮聽。」巴錄就讀互𪜶聽。
16 𪜶聽了，真驚惶，互相看來看去。𪜶給巴錄講：「阮一定著將諸個話攏對王報告。」
17 𪜶閣問巴錄：「請給阮講，你按怎給諸個寫起來？是耶利米親嘴講的是無？」
18 巴錄應講：「所有諸個話攏是伊親嘴給我講的，我就用筆墨寫佇冊卷。」
19 許個官員給巴錄講：「你及耶利米著去匿起來，毋通互人知恁佇叨位。」
20 許個官員將彼卷冊下佇書記官以利沙瑪的房間，然後入去王宮的埕去見王，將諸個話對王報告。
21 王就派猶底去書記官以利沙瑪的房間，提彼卷冊來，讀互王及徛佇王左右的人臣聽。
22 彼陣是九月，王坐佇冬宮；伊頭前火爐的火啲𤏸。
23 猶底逐遍讀三四欄，王就用書記的刀仔給冊卷割破，㧒落火爐，到歸卷冊攏燒了了。
24 王及許個人臣聽著諸個話攏無啲驚，嘛無拆裂𪜶的衫。
25 以利拿單、第來雅、基瑪利雅請求王毋通燒彼卷冊，毋拘王攏毋聽。
26 王顛倒命令王子耶拉篾、亞斯列的子西萊雅，及亞伯疊的子示利米雅去掠書記巴錄及先知耶利米；毋拘上主給𪜶兩個藏起來。
27 約雅敬王將耶利米講互巴錄寫落來彼卷冊燒去了後，上主對耶利米講話，講：
28 「你閣提一卷冊卷，將猶大王約雅敬燒去彼卷冊內面的話閣寫一遍。
29 關係猶大王約雅敬，你著講，上主按呢講：你燒彼卷冊，閣講：『耶利米是按怎佇彼內面寫，巴比倫王會來毀滅此塊土地，消滅諸個人民及牲生？』
30 所以，上主針對猶大王約雅敬按呢講：伊的子孫一定無人會當坐大闢的王位；伊的屍體會互人㧒佇外面，日時互日曝，暝時互霜凍。
31 我欲因為伊、伊的子兒，及伊的人臣的罪孽給𪜶刑罰，嘛欲將我對𪜶講過的災禍降互𪜶及耶路撒冷的住民，以及猶大人民。毋拘𪜶猶是毋聽趁。」
32 耶利米就閣提一卷冊卷，交互尼利亞的子書記巴錄，叫伊將互猶大王約雅敬燒去彼卷冊卷的內容閣寫一遍，另外閣補充真多類似的話。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。