上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
34
警告西底家
巴比倫王尼布甲尼撒導伊全部的軍隊，及伊所統治世界的逐國逐族，來攻打耶路撒冷及附近的城鎮。彼時，上主對耶利米講：
2 「我上主 — 以色列的上帝吩咐你著去給猶大王西底家按呢講：上主欲給此個城交互巴比倫王，伊會給伊放火燒。
3 你無法度脫離伊的手頭，一定會互人掠去交互伊。你會互伊當面審問，互伊掠去巴比倫。
4 猶大王西底家，你著注意聽我的話。上主按呢給你講：你𣍐互人刣死，
5 會平安死。你死了，人會親像啲給你的祖先以前的王燒香按呢，給你燒香。𪜶會給你唱哀歌，講：『唉啊，阮的王！』上主按呢宣告。」
6 先知耶利米就將諸個話給佇耶路撒冷的猶大王西底家講。
7 彼時，巴比倫王的軍隊已經啲攻打耶路撒冷及猶大的城拉吉及亞西加；猶大堅固的城只有賰此兩個。
違背解放奴隸的約
8 西底家王有及耶路撒冷的人民立約，欲給奴隸宣布自由，
9 逐個人解放希伯來男女奴隸，無閣有人用同胞猶大人做奴隸。
10 許個有參與此個約的領袖及人民就解放𪜶的男女奴隸，互𪜶得著自由，無閣用𪜶做奴隸；許個領袖及人民攏同意，解放男女奴隸。
11 毋拘，後來𪜶後悔，叫𪜶所解放的男女奴隸攏倒來，強迫𪜶閣做奴隸。
12 上主就吩咐耶利米對以色列人講：
13 「上主 — 以色列的上帝按呢講：我給恁的祖先對埃及做奴隸的地導出來的時，有及𪜶立約，吩咐𪜶：
14 『恁買來的希伯來同胞服事恁六年了後，到第七年，恁逐個人著給𪜶解放，互𪜶自由離開。』毋拘恁的祖先攏無聽，無順趁我。
15 最近，恁有改變心意，做我看做正直的事，逐個人佇敬拜我的聖殿，佇我的面前立約，給恁的同胞宣布自由。
16 毋拘恁煞後悔，竟然給恁解放的男女奴隸叫倒來，強迫𪜶閣做奴隸，褻瀆我的名。
17 所以，我上主按呢講：恁既然無欲順趁我，無給恁做奴隸的同胞、厝邊宣布自由，按呢，我欲放恁互戰亂、瘟疫、飢荒踐踏，互列國的人看著恁的遭遇感覺著驚。上主按呢宣告。
18-19 猶大及耶路撒冷的領袖、官員、祭司，以及所有的人民及我立約；𪜶將細隻牛破做兩旁，對兩旁的中央行過，毋拘𪜶違背此個約，無遵守約的規定。所以，我欲互𪜶親像細隻牛受破開。
20 我欲給𪜶交互𪜶的對敵及數想𪜶性命的人。𪜶的身屍會成做空中飛鳥及地上野獸的食物。
21 我嘛欲將猶大王西底家及伊的人臣交互𪜶的對敵及數想𪜶性命的人，以及暫時撤退的巴比倫軍隊。
22 我欲命令巴比倫的軍隊閣倒來攻打此個城，給伊攻佔，放火燒；我欲互猶大的城鎮拋荒，無人住。上主按呢宣告。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。