上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
33
閣再應允復國
耶利米猶互人關佇監獄的時，上主第二遍對伊講話：
2 「彼位創造大地，互伊成形，互伊堅固的上主按呢講：
3 『你求我，我就應你，欲將你毋知、偉大奧祕的事指示你。
4 針對城內許個為著欲阻擋對敵造土堆、用刀劍攻城所拆毀的厝及猶大君王的宮殿，我上主 — 以色列的上帝按呢講：
5 恁及巴比倫人交戰的時，𪜶欲將我佇憤怒及大受氣中刣死的人的身屍，貯滿諸個厝；因為恁罪惡貫滿，我已經放拺此個城。
6 毋拘，我欲互此個城復原，欲醫治城內的人，互𪜶的孔嘴生肉過皮，互𪜶充分享受和平安全。
7 我欲給受掠的猶大人及以色列人導倒來，重建𪜶的家園。
8 我欲給𪜶得罪我的罪洗清氣，閣赦免𪜶所有背叛我的罪。
9 因為我的緣故，此個城佇地上萬國中會得著歡喜、頌讚，及尊榮，為著按呢來出名。列國欲因為聽著我賜互此個城的人繁榮及福氣攏驚畏我。』」
10 上主按呢講：「恁攏講『此塊土地是荒埔、無人住、無牲生的地』；毋拘，拋荒、無人住、無人影、無牲生的猶大城鎮及耶路撒冷的街路，會閣聽著
11 歡喜快樂的聲、婚宴喜慶的聲，閣聽著人帶祭物來到上主的聖殿感謝的聲，講：
著感謝上主 — 萬軍的統帥，因為上主至善，
伊的慈愛永遠存續！
我欲導𪜶對受掠的地倒來，互𪜶回復早前的盛況。」上主按呢宣布。
12 上主 — 萬軍的統帥按呢講：「此個拋荒、無人影、無牲生的所在，遐所有的城鎮會閣有牧者的草場，互羊倒佇遐歇睏。
13 山地、山埔、尼革夫、便雅憫地區、耶路撒冷周圍，以及猶大的城鎮，會閣有人點算對𪜶手下經過的羊群。」上主按呢宣布。
14 上主講：「時日啲欲到，我對以色列人及猶大人應允的祝福攏欲實現。
15 佇許個時日，我欲互大闢的世系發一枝公義的枝；伊欲佇此個土地施行公平及正義。
16 因為伊的執政，猶大欲得著解救，耶路撒冷會當安居樂業。人會給伊叫做『上主是阮的公義』。
17 因為上主按呢講：大闢的後代繼續會有人統治以色列；
18 利未支族一定會有祭司繼續獻燒化祭及素祭，燒祭物服事我，辦理獻祭的事。」
19 上主對耶利米講：
20 「我上主按呢講：恁若會當廢除我及日時、暝時定的約，互𪜶無照所定的時間運轉，
21 才會當給我及我的僕人大闢立的約宣告無效，互伊無後代坐王位，嘛才會當給我及服事我的利未人祭司所立的約宣告無效。
22 我欲互我的僕人大闢的後代及服事我的利未人加添，親像天頂的星𣍐算得，親像海邊的沙𣍐量得。」
23 上主閣給耶利米講：
24 「諸個人民講『上主所揀選兩個族，伊攏給𪜶放拺啦』，你有聽著無？𪜶按呢講是看輕我的子民，無閣給𪜶看做一個國家。
25 我上主按呢宣布：我若無及日時、暝時定約，無給天地定定律，
26 我才會給雅各及我的僕人大闢的子孫棄拺，無欲對大闢的子孫選立人統治亞伯拉罕、以撒、雅各的後代。我欲憐憫𪜶，互許個流放的人倒轉來。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。