上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
31
以色列人倒去故鄉
「到彼時，我欲做以色列逐宗族的上帝，𪜶欲做我的子民。」上主按呢宣布。
2 上主按呢講：「脫離刀劍賰落來的子民，佇曠野得著恩惠；以色列尋著安歇的所在。
3 上主對古早就對𪜶表明：『我用不變的疼疼你，我欲永遠用慈愛對待你。』
4 所疼的以色列啊，我欲給你重建，你就通閣提玲瓏鼓出去及歡喜快樂的人做夥跳舞。
5 你會閣佇撒馬利亞的山頂栽種葡萄；栽種的人會當享受果子。
6 到有一日，守望的人一定會佇以法蓮的山頂喝講：『起來，咱來去錫安朝見上主 — 咱的上帝！』」
7 上主閣講：
「著為雅各歡喜唱歌，
為上偉大的國家歡呼。
著傳報，著稱讚，講：
『上主已經解救伊的子民，
解救以色列賰落來的人。』
8 看咧，我欲對北方導𪜶倒來，
對天邊海角將𪜶召集倚來；
失明的、腳跛的、懷孕的、啲欲生產的
攏歸大陣同齊倒來。
9 𪜶沿路哭倒來；
我欲安慰𪜶引導𪜶，
導𪜶順溪水邊行，
行平坦的路𣍐跋倒；
我是以色列的父，
以法蓮是我的大子。
10 「列國啊，著聽上主的話，
著佇真遠的海島宣揚，講：
『趕散以色列彼位欲召集伊，
欲看顧伊親像牧者顧守羊群。』
11 我上主已經救贖雅各，
解救伊脫離比伊較強的人的手頭。
12 𪜶欲來錫安高的所在歡呼，
為著上主所賜的好物歡頭喜面，
因為上主賜𪜶五穀、新酒，及新油，
閣有羊羔及細隻牛仔；
𪜶欲親像有水灌沃的園，
𣍐閣憂苦。
13 彼時，查某囝仔欲歡喜跳舞，
少年人及老人做夥快樂；
我欲互𪜶的悲傷變做歡喜，
欲安慰𪜶，
互𪜶有喜樂代替悲哀。
14 我欲用油膩互祭司飽足，
我的子民欲因為我的恩惠心滿意足。」
上主按呢宣布。
15 上主講：
「佇拉瑪有聽著悲傷哀哭的聲；
蕾潔為著伊的子兒哀哭，
毋願受安慰，因為𪜶攏無去啦。」
16 上主閣講：
「毋通閣出聲哀哭，
毋免閣流目屎；
你的勞苦一定會得著報賞。
𪜶一定會對對敵的土地倒來。
上主按呢宣布。
17 你的將來充滿希望；
你的子兒一定會倒來𪜶家己的鄉土。」
上主按呢宣布。
18 「我清楚聽著以法蓮人為著家己啲怨嘆：
阮親像猶未受訓練的青牛仔，
你給阮管教，阮就接受。
求你導阮倒轉來，阮就悔改歸向你，
因為你是上主 — 阮的上帝。
19 阮一下背叛你，就後悔；
受你管教，阮就搥心肝。
阮因為少年的時受的侮辱，
無面通見人。」
20 「以法蓮人豈毋是我疼的子？
豈毋是我意愛的囝仔？
我逐遍責備伊，
猶原深深思念伊。
我為著伊牽腸掛肚，
我一定憐憫伊。
上主按呢宣布。
21 你著為家己設指路牌，
為家己𫞼引路柱；
著留心致意你行過的大路，
順彼條路倒轉來。
在室女以色列啊，
你著倒來，
倒來你家己的城鎮。
22 忤逆的查某子，
你四界流浪欲到底時？
上主已經佇此個地上創造一件新的事，
就是查某人欲保護查甫人。」
上主的子民前途光明
23 上主 — 萬軍的統帥、以色列的上帝按呢講：「我互受掠的子民倒來的時，𪜶佇猶大的土地及城鎮會閣按呢講：『公義的厝，聖的山啊，願上主賜福你！』
24 作穡人及顧羊的人攏會做夥住佇猶大逐個城鎮。
25 厭倦的人，我互𪜶元氣；憂苦的人，我互𪜶滿足。」
26 按呢，我睏醒，發見我真好睏。
27 上主講：「日子啲欲到，我欲互以色列家及猶大家人口加添，牲生興旺。
28 我以前留心看𪜶，給𪜶拔出、拆毀、破壞、推翻，及傷害；以後我欲閣留心看𪜶，給𪜶重建、栽種。上主按呢宣布。
29 彼時人𣍐閣講：
老父食酸葡萄，
子的嘴齒酸軟。
30 今，食酸葡萄的，家己的嘴齒欲酸軟；逐個人會因為家己的罪死。」
立新的約
31 上主講：「看咧，日子啲欲到，我欲及以色列家及猶大家立新的約。
32 此個約及我以前及𪜶的祖先所立的約無仝款；彼個約是我牽𪜶的祖先的手，對埃及給𪜶導出來的時及𪜶立的約。我雖然作𪜶的丈夫，毋拘𪜶破壞彼個約。上主按呢宣告。
33 許個日子以後，我及全體以色列人所欲立的約是按呢：我欲將我的律法下佇𪜶的心內，刻佇𪜶的心版。我欲做𪜶的上帝，𪜶欲做我的子民。上主按呢宣布。
34 𪜶毋免閣教導家己的厝邊及同胞，講：『恁著認識上主。』因為𪜶對大到細攏會認識我。我欲赦免𪜶的罪過，給𪜶的罪放𣍐記得。」上主按呢宣布。
35 上主互日頭佇日時發光，
互月娘及星辰照定律照光暗暝；
伊攪撈大海，互海水夯大湧。
伊的稱呼是上主 — 萬軍的統帥。
伊按呢講：
36 自然界的定律若會對我的面前廢止，
我的子民以色列才會佇我的面前斷絕，
永遠𣍐閣成做國家。
上主按呢宣布。
37 天若會測量得，
地的根基若會探查得，
我才會因為以色列的後代的所做
給𪜶棄拺。
上主按呢宣布。
38 上主講：「許個日子真正會來，耶路撒冷此座城會閣修建歸互上主，對哈楠業樓到角門。
39 測量的索欲伸出去到迦立山，斡去歌亞，
40 經過埋死人摒糞埽的山谷，到汲淪溪谷，直到東旁馬門的斡角彼片的土地，攏欲聖化歸上主，永遠𣍐閣受拔出，受破壞。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。