上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
29
耶利米寫批互受掠佇巴比倫的猶大人
先知耶利米對耶路撒冷寫批互尼布甲尼撒對耶路撒冷掠去巴比倫猶活啲的長老、祭司、先知，以及所有的人民。
2 此張批是佇約雅斤王、太后及朝廷的人臣、猶大及耶路撒冷的領袖、作工師傅及拍鐵師傅，互人對耶路撒冷掠去以後寫的。
3 此張批是託沙番的子以利亞薩，及希勒家的子基瑪利雅帶去巴比倫；𪜶兩個人有受猶大王西底家派去見巴比倫王尼布甲尼撒。批按呢寫：
4 上主 — 萬軍的統帥、以色列的上帝給所有對耶路撒冷受掠去巴比倫的人按呢講：
5 「恁著佇巴比倫起厝住，種作，食出產的物，
6 娶某生子，互恁的後生查某子結婚，養育子女。恁著佇遐生湠，毋通互恁的人口減少。
7 恁著為給恁流放去的城鎮求平安，向上主祈禱，因為許個城鎮平安繁榮，恁才會平安繁榮。」
8 上主 — 萬軍的統帥、以色列的上帝閣給恁講：「毋通互恁中間的先知及卜卦的騙去，嘛毋通信𪜶做的夢。
9 因為我無差派諸個人，毋拘𪜶利用我的名講假的預言。」上主按呢宣告。
10 上主閣講：「我為巴比倫所定七十年的期限一下滿，我會眷顧恁，實現我對恁講過欲賜福的應允，導恁轉來此塊土地。
11 上主按呢講：我確實知，我為著恁定的計劃是欲互恁平安繁榮，毋是欲互恁受災禍，通互恁有光明的將來。
12 恁求叫我，向我祈禱，我會注意聽。
13 恁若尋求我，恁會尋著；恁若全心尋求我，
14 我一定會互恁尋著。上主按呢講。我嘛欲給恁諸個受掠的人導倒來；將恁對我給恁流放去的逐國逐所在召集，導轉來恁受掠離開的鄉土。」上主按呢宣布。
15 恁講：「上主有佇巴比倫給阮興起先知。」
16 今，針對坐大闢寶座的王，及住佇此個城無及恁做夥受流放的同胞，
17 上主 — 萬軍的統帥按呢講：「著注意聽！我欲互𪜶受戰亂、飢荒、瘟疫的災難，互𪜶變做爛甲𣍐食得的無花果。
18 我欲用戰亂、飢荒、瘟疫追趇𪜶，互𪜶流放去佇天下萬族；𪜶無論互我趕去叨位，遐的人攏會給𪜶咒詛，恥笑，侮辱，閣對𪜶的遭遇感覺著驚。
19 上主講，這是因為𪜶無聽趁我的話。我一遍閣一遍差派我的僕人眾先知去給𪜶講話，𪜶攏毋聽。
20 所以，恁諸個互我對耶路撒冷流放去巴比倫的人，著注意聽我上主的話。」
21 關係哥賴雅的子亞哈，及瑪西雅的子西底家，上主 — 萬軍的統帥、以色列的上帝按呢講：「𪜶利用我的名對恁講假的預言，我欲將𪜶交互巴比倫王尼布甲尼撒；伊會佇恁的面前給𪜶處死。
22 恁所有互人掠去巴比倫的猶大人欲給人咒詛的時，會用此兩個人的名給人講：『願上主互你親像巴比倫王用火燒死的西底家及亞哈。』
23 因為𪜶佇以色列人的中間做見笑事，及厝邊的某行姦淫，閣利用我的名講我無命令𪜶講的白賊話。我知影諸個代誌，嘛親身作證。」上主按呢宣告。
示瑪雅的批
24 關係尼希蘭人示瑪雅，
25 上主 — 萬軍的統帥、以色列的上帝按呢講：「你有用你家己的名寫批互耶路撒冷所有的人民、瑪西雅的子祭司西番雅，及所有的祭司，講：
26 『上主已經設立你西番雅做祭司，取代耶何耶大做上主聖殿的監督，會當給所有家己封做先知的𤞚人銬柴枷鐵箍。
27 現在，亞拿突人耶利米自稱是先知，你是按怎無給伊指責？
28 伊有寫批來巴比倫，給阮講，阮流放的時間會拖真久，所以著佇遮起厝住，種作，食出產的物。』」
29 祭司西番雅將此張批讀互先知耶利米聽。
30 彼時，上主對耶利米講：
31 「你著寫批互所有流放佇巴比倫的同胞：
「關係尼希蘭人示瑪雅，上主講：『我無差派示瑪雅，毋拘伊竟然對恁講預言，互恁相信伊的白賊話，
32 所以我上主按呢講：我欲刑罰尼希蘭人示瑪雅及伊的後代。伊的後代一定無一個會當住佇諸個人民中間，嘛𣍐當活啲享受我欲賜互我的子民的福氣，因為伊煽動人背叛上主。』上主按呢宣告。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。