上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
26
耶利米受審問
約西亞的子約雅敬開始作猶大王的時，上主對耶利米講：
2 「上主按呢講：你著去徛佇上主聖殿的埕，將我命令你著講的話給許個對猶大逐個城鎮來敬拜上主的人講；連一句都毋通無講。
3 可能𪜶會聽，逐個人會離開𪜶邪惡的道路，按呢我就欲改變心意，無欲因為𪜶邪惡的行為降災禍互𪜶。
4 「你著給𪜶講：『上主按呢講：恁若無欲聽趁我的話，無欲遵行我頒布互恁的律法，
5 無欲聽趁我派我的僕人眾先知來恁遮所講的話，我一遍閣一遍派𪜶來，恁猶原毋聽，
6 所以我欲互此間聖殿及示羅仝款，互此個城成做地上萬族咒詛的對象。』」
7 耶利米佇上主的聖殿講諸個話，祭司、先知，及所有的人民攏有聽著。
8 耶利米將上主命令伊著對所有的人民講的話講煞，祭司、先知，及人民給伊掠起來，講：「你該死！
9 你是按怎利用上主的名講預言，講此間聖殿會親像示羅，此個城一定會拋荒，無人住？」所有的人民就攏集倚來上主的聖殿，給耶利米圍啲。
10 猶大的官員聽著諸個代誌，就對王宮上來上主的聖殿，坐𫢶上主聖殿的新門門口。
11 祭司、先知對官員及人民講：「此個人著給處死刑。伊講預言攻擊此個城；恁嘛有聽著伊按呢講。」
12 耶利米就對許個官員及人民講：「上主派我傳達伊的話，攻擊此間聖殿及此座城；就是傳講恁抵即聽著許個話。
13 今恁著改變恁的所行所做，聽趁上主 — 恁的上帝的話，伊就會改變心意，將伊所宣布欲降互恁的災禍取消。
14 我咧，我已經佇恁的手頭，恁看欲按怎給我處理，就照恁看做著的、好的給我處理。
15 毋拘恁著確實知，恁若給我處死，恁此個城以及諸個住民著擔害死無辜的人的性命的責任，因為上主真正有派我來恁遮，將諸個話攏講互恁知。」
16 官員及全體民眾就對祭司及先知講：「此個人無應該給伊處死，因為伊奉上主 — 咱的上帝的名對咱講話。」
17 有一寡國內的長老徛起來，對聚集的民眾講：
18 「希西家王統治猶大的時，摩利設人彌迦對猶大人民講預言，講：『上主 — 萬軍的統帥按呢講：
錫安會親像田園互人犁，
耶路撒冷會變做土堆，
此個殿的山會變做樹林的山崙仔。』
19 猶大王希西家及猶大人民豈有給彌迦處死？希西家豈毋是敬畏上主，有求上主憐憫，上主就改變心意，無將伊原來所講的災禍降落？咱現在煞欲家己惹災禍。」
20 另外有一個基列‧耶琳人，叫做烏利亞，是示瑪雅的子；伊奉上主的名講預言，及耶利米仝款講預言攻擊此座城及此個國家。
21 約雅敬王及伊的軍官、官員聽著烏利亞的話了後，王想欲給伊處死。烏利亞一下聽見此個消息就驚，逃走去埃及。
22 約雅敬王派亞革波的子以利拿單導幾若個人去埃及，
23 給烏利亞對埃及掠轉來交互約雅敬王；王就給伊處死，將伊的身屍㧒佇平民的墓地。
24 毋拘，沙番的子亞希甘保護耶利米，無將耶利米交互人民處死。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。