上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
25
對北方來的對敵
約西亞的子約雅敬作猶大王第四年，就是尼布甲尼撒作巴比倫王的第一年，上主將有關猶大人民的話傳互耶利米。
2 先知耶利米就將諸個話給所有的猶大人民及耶路撒冷的住民講：
3 「對亞們王的子約西亞作王第十三年到今仔日，此二十三年來，上主不時對我講話，我嘛繼續將伊的話傳互恁，毋拘恁攏無欲聽趁。
4 上主雖然一遍閣一遍派伊的僕人眾先知來恁遮，毋拘恁完全毋聽趁。
5 𪜶給恁講：『恁逐個人著悔改，離開邪惡的道路，放拺罪惡的行為；按呢，恁才會當永永遠遠住佇上主賜互恁及恁的祖先的土地。
6-7 所以上主講：恁毋通去隨別個神明，服事敬拜𪜶；毋通拜恁的手造的物，惹我受氣；按呢我就𣍐降災禍互恁。毋拘，恁攏毋聽趁，顛倒去拜家己的手造的偶像，惹我受氣，家己惹禍端。』」
8 上主 — 萬軍的統帥講：「因為恁毋聽趁我的話，
9 我欲召北方的民族及我的僕人巴比倫王尼布甲尼撒，來攻擊此個土地及許個住民，以及周圍的民族。我欲給𪜶徹底消滅，互此個地永遠拋荒，互人著驚恥笑。上主按呢宣告。
10 我嘛欲互𪜶無閣有歡喜快樂的聲，無閣有婚宴喜慶的聲，無人挨磨，無人點燈。
11 全國攏會拋荒，互人著驚。諸個國家會服事巴比倫王七十年。
12 七十年滿了後，我欲因為巴比倫王及此個民族所犯的罪給𪜶刑罰，消滅此個國家，互彼個地永遠荒廢。上主按呢宣布。
13 我欲互我針對此個國家所講的話實現，嘛欲互記載佇此本冊關係耶利米對列國的預言攏實現。
14 我欲照巴比倫人的行為及𪜶的手所做的報應𪜶；會有真多國及大君王掠𪜶去做奴隸。」
上主審判列國
15 上主 — 以色列的上帝按呢給我講：「你著對我的手給此杯受氣的酒接去，提去互我派你去的逐國飲。
16 𪜶飲了會東倒西歪，起𤞚，因為我欲互𪜶抵著戰亂。」
17 我就對上主的手給此杯酒接過來，提去互上主派我去的逐國飲；
18 包括耶路撒冷及猶大的城鎮，猶大的君王及領袖，互諸個城鎮拋荒受棄拺；互人恥笑、咒詛，親像今仔日按呢；
19 嘛包括埃及王法老、伊的人臣、領袖及所有的人民，
20 以及外族人、烏斯地區的君王、非利士的諸王：亞實基倫、迦薩、以革倫，以及亞實突賰落來的人；
21 以東人、摩押人、亞捫人；
22 泰爾及西頓的君王、地中海沿海地區的君王；
23 底但、提瑪、布斯，及剃鬢邊的民族，
24 阿拉伯的君王，沙漠地區逐族的王；
25 心利、以攔、米底亞所有的君王；
26 北方無論遠抑是近的君王。全世界的逐國攏欲飲此杯酒；最後巴比倫王嘛著飲。
27 上主對我講：「你著給𪜶講：『上主 — 萬軍的統帥、以色列的上帝按呢講：恁著飲此杯酒飲甲醉，飲甲吐，飲甲跋倒，飲甲𬦰𣍐起來，因為我欲互恁抵著戰亂。
28 𪜶若毋肯接你此杯酒去飲，你著給𪜶講：上主 — 萬軍的統帥按呢講：恁一定著飲！
29 我既然對此座奉我的名起的城開始降災禍，恁豈會當免受刑罰？恁一定𣍐！因為我已經命令刀劍來攻擊全地的住民。上主 — 萬軍的統帥按呢宣告。』
30 「所以你著將我交代的話對𪜶宣講，責備𪜶：
上主對天頂大聲喝，
對伊住聖的所在喝聲，
伊對牧場的羊群大聲喝；
對地上所有的住民喝聲，
親像踏葡萄的人啲喝。
31 上主喝的聲會傳到天邊海角，
因為伊欲控告萬族，
欲審判所有的人。
邪惡的人，伊欲互𪜶死佇刀下。
上主按呢宣告。」
32 上主 — 萬軍的統帥閣講：「著注意，會有災難對此國湠到彼國，會有大暴風對世界的盡頭絞起來。
33 到彼日，對地的此旁頭到彼旁頭，一四界攏是上主刣死的人。無人為著𪜶啼哭，無人給𪜶收身屍，無人給𪜶埋；許個屍體攏欲變做地面的糞。
34 「人民的牧者啊，恁著哀哭喉叫！羊群的領袖啊，恁著哀傷，佇土沙粉翱來翱去！恁欲互人剿滅的日子到啦。恁會摔倒，親像貴重的瓷器摔甲碎碎。
35 牧者無路通逃走；羊群的領袖嘛無法度逃脫。
36 著注意聽，牧者啲喉叫，羊群的領袖啲哀哭，因為上主啲毀壞𪜶的牧場。
37 上主發出猛烈的受氣；平安青翠的牧場變做荒埔。
38 上主親像少壯的獅離開穴；𪜶的土地，因為欺壓者的受氣，閣因為上主猛烈的受氣，變做拋荒的所在。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。