上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
22
耶利米警告猶大王室
1-2 上主叫我入去猶大王宮，給坐大闢王位的猶大王、官員，以及耶路撒冷的人民講：「著注意聽上主的話。
3 上主按呢講：『恁著秉公行義，對欺壓的人的手解救受壓制的人；毋通虐待抑是用強暴的手段對待外族人、孤兒、寡婦，嘛毋通佇此塊土地流無辜的人的血。
4 恁若切實遵守我的命令，坐大闢寶座的君王，及許個官員、人民就通坐馬車抑是騎馬，經過城門進入王宮。
5 毋拘恁若無欲服從我的命令，我指家己立誓，此個宮殿會成做荒埔。我上主按呢宣告。
6 「『對我上主來看，猶大的王宮親像基列，親像黎巴嫩的山頂赫呢媠；毋拘我欲互伊變做荒埔，無人徛起。
7 我會派人給伊毀滅；𪜶會帶斧頭來剉斷許個柏香樹做的柱，給㧒落火。
8 「『會有真多外族人經過此個城，互相講來講去：上主是按怎按呢對待此個大的城？
9 有人會講：是因為此個城的人違背上主 — 𪜶的上帝及𪜶立的約，去服事敬拜別個神明。』」
有關約哈斯
10 猶大人，毋免為著已經死去的王哀哭，
毋免為著伊悲傷；
著為伊的子約哈斯哀哭，
因為約哈斯受掠𣍐閣轉來，
𣍐當閣看著家己的鄉土。
11 有關繼承伊的老父約西亞做猶大王的約哈斯，上主按呢講：「伊受掠離開此個所在，永遠𣍐閣轉來。
12 伊會死佇受掠去的所在，𣍐當閣看著此塊土地。」
有關約雅敬
13 此個人有災禍啦！
伊用無公義的手段起家己的宮殿，
用無公道的方法起樓仔厝；
伊互家己的同胞做白工，
攏無互𪜶工錢。
14 伊講：「我欲為家己起高樓大厝，
給厝開窗仔，
用柏香柴裝潢，
壁枋漆紅色。」
15 你用柏香柴造高貴的宮殿，
欲表示你比別人較𠢕作王是無？
你的老父豈毋是秉公行義，
一世人享受福氣，
事事亨通？
16 伊為困苦及散赤的人申冤，
彼時伊事事亨通；
這豈毋是因為伊真正識我？
上主按呢講。
17 毋拘你的心目干焦看家己的利益，
流無辜的人的血，
欺負壓制人民。
18 所以，針對約西亞的子猶大王約雅敬，上主按呢講：
無人會為著伊哀傷，講：
「唉啊，我的兄弟，我的姊妹！」
無人會為著伊哀哭，講：
「唉啊，我的主，我的王！」
19 伊受埋葬親像人啲埋驢仔，
互人拖走，㧒出去耶路撒冷城外。
有關耶路撒冷人民的命運
20 耶路撒冷的住民啊，
著𬦰上黎巴嫩山大聲喝！
去巴珊大聲哭！
去摩押的山頂大聲喝！
及你結盟的朋友攏受拍敗啦。
21 恁早前安定的時，我警告恁，
恁攏毋聽！
恁對少年就按呢，
毋聽我的話。
22 恁的首領會互風吹走；
及恁結盟的朋友會受掠。
恁攏會受侮辱，
因為恁的所做攏是歹。
23 恁住佇黎巴嫩，佇柏香柴起的宮殿，
恁掠做安全；
災難一下到，
恁會親像婦仁人催陣，痛苦哀叫。
上帝審判約雅斤
24 上主對約雅敬的子猶大王約雅斤講：「我欲指我永遠的活命立誓，雖然你是我正手的手指印，我嘛欲給你剝落來，
25 交互許個你所驚，欲刣你的人，就是巴比倫王尼布甲尼撒及伊的軍隊。
26 我欲將你及你的老母趕去外國，去毋是恁出世的所在；恁會死佇遐。
27 恁真愛倒來，毋拘永遠𣍐當倒來。」
28 上主閣講：「約雅斤豈毋是親像一塊破碎、無人欲揲的盤仔？是按怎伊及伊的子兒、查某子攏受㧒确，流亡佇外地？
29 大地啊，大地！著注意聽上主的話。
30 著記一筆：此個人無後嗣，
是一生攏無成就的人；
伊無後代繼承大闢的王位，
通繼續統治猶大。」
上主按呢宣告。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。