上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
18
耶利米佇燒瓷人的厝
上主對耶利米講：
2 「你去燒瓷人的厝，我欲佇遐對你講話。」
3 我就去燒瓷人的厝，看著伊啲踅轉盤做瓷器。
4 伊手中所做的瓷，做無好勢，就用彼塊瓷土另外做伊合意的瓷器。
5 上主閣對我講：
6 「以色列家啊，我豈𣍐當親像燒瓷人按呢對待恁？瓷土佇燒瓷人的手裡按怎，恁佇我的手裡嘛像款。
7 無論什麼時，我宣布欲拔出、拆毀，抑是破壞一個國家，
8 彼個國家若離開邪惡，我就會回心轉意，無降災禍互𪜶。
9 無論什麼時，我宣布欲栽種、重建一個國家，
10 彼個國家若毋聽趁我的話，做我看做歹的事，我就會改變心意，無欲將我所應允的福氣賜互𪜶。
11 今，你著對猶大人及耶路撒冷的住民講：『上主按呢講：我決定欲處罰恁，降災禍互恁；恁著回頭離開恁邪惡的行為，改正恁的所行所做。
12 𪜶會應講：你講這無路用啦！阮欲照家己的計劃行，逐個人照邪惡的本性做。』」
以色列人棄拺上主
13 上主按呢講：
「恁問諸個國家，
有什麼人聽過此款代誌？
以色列竟然做即呢可惡的事！
14 黎巴嫩山頂的雪豈曾溶過？
山頂流落來清涼的溪水豈會焦去？
15 毋拘，我的人民𣍐記得我，
給虛假的神明燒香，
致到𪜶佇應該行的路跋倒；
𪜶無行古早的正路，
顛倒去行嵁硈歪斜的路。
16 𪜶的土地變做拋荒的所在，
永遠互人恥笑；
過路的人攏驚惶幌頭。
17 我欲佇對敵的面前
親像東風給我的子民吹散；
我欲佇𪜶抵著災難的時，
越轉身毋插𪜶。」
謀害耶利米
18 𪜶講：「來，咱來設計對付耶利米！咱不時有祭司教律法，有智慧的人出計智，嘛有先知傳達上帝的話。咱來控告耶利米，閣聽伊的話。」
19 因為按呢，我祈禱講：「上主啊，求你聽我的懇求，嘛聽我的對敵控告我的話。
20 人豈會用得用歹報好？𪜶挖陷阱欲害我。求你會記得我按怎佇你的面前替𪜶講好話，互你無對𪜶發受氣。
21 毋拘，此時我求你互𪜶的兒女抵著飢荒，死佇刀劍；互𪜶的某失去丈夫及子兒，查甫人互人刣死，少年人死佇戰場。
22 求你派一大陣強盜忽然來到，互驚惶啼哭的聲對厝內傳出來；因為𪜶挖陷阱欲掠我，用羅網欲互我跋倒。
23 上主啊，你知𪜶設計欲刣我，求你毋通赦免𪜶的罪，毋通擦消𪜶的罪過；求你互𪜶佇你的面前失敗見笑；求你發大受氣給𪜶刑罰。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。