上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
7
耶利米佇聖殿講道
上主的話臨到耶利米，講：
2 「你著去徛佇上主聖殿的門口，宣講諸個話：
「所有入來敬拜上主的猶大人，著注意聽上主的話。
3 「上主 — 萬軍的統帥、以色列的上帝按呢講：
「著改正恁的言行舉止，按呢我就互恁住佇此塊土地。
4 毋通相信許個白賊話，講：『這是上主的殿！這是上主的殿！上主的殿佇遮！安全啦！』
5 「恁若實在改正言行舉止，佇人及人的中間實行公平正直，
6 無欺壓寄居的出外人、孤兒、寡婦，無佇此個所在謀害無辜的人，無拜別個神明，給家己惹禍端，
7 我就欲互恁永遠住佇我賜互恁的祖先徛起的此個所在。
8 「恁看，恁竟然相信許個無路用的白賊話。
9 恁哪會用得偷提，謀害，姦淫，咒假誓，給巴力燒香，去隨恁毋識的神明，
10 閣來此間奉我的名起的聖殿敬拜我，講『阮有救啦』，通繼續去做許個可惡的事？
11 此間奉我的名起的聖殿，恁給伊看做土匪仔窟是無？恁著知，恁啲做啥，我攏有看著！上主按呢講。
12 「恁去示羅看覓咧。古早，我佇遐設立敬拜我的所在，毋拘恁著去看，我因為我的子民以色列的罪惡，按怎對付彼個所在。
13 現在恁做諸個代誌，我一再給恁勸戒，毋拘恁攏毋聽；給恁叫，恁嘛毋應；
14 所以，我欲親像對付示羅按呢毀壞此間恁所倚靠，奉我的名起的聖殿，以及此塊我賜互恁及恁祖先的土地。
15 我嘛欲給恁對我的面前趕走，親像以前我將恁的親族以法蓮的後代趕走像款。」
人民違背命令
16 你毋免為著此個人民祈禱，毋免為著𪜶大聲哀求，嘛毋免替𪜶對我懇求，因為我攏無欲聽。
17 你豈無看著𪜶佇猶大的城鎮及耶路撒冷的街路啲創什麼？
18 囝仔拾柴，老父燃火，老母抄麵粉做餅，獻互天后，閣給別個神明獻奠酒祭，刁工惹我受氣。
19 上主講：其實𪜶毋是傷害著我，是傷著家己，害家己見笑。
20 所以至高的上主按呢講：我欲將我猛烈的受氣摒佇此個所在的住民及動物身上，以及田野的樹木及土地的出產。我的受氣會親像大火啲𤏸無人拍會化。
21 上主 — 萬軍的統帥、以色列的上帝按呢講：「恁獻祭的時，做恁將燒化祭的肉摻做夥食食去。
22 我導恁的祖先出埃及的時，我毋曾對𪜶提起燒化祭及其他的祭祀，嘛毋曾命令𪜶著按呢做。
23 我干焦給𪜶命令此項事：『恁著聽我的話，行我所命令恁的路，我就欲做恁的上帝，恁做我的子民，通互恁事事順利。』
24 毋拘𪜶毋聽趁，毋注意聽我的話，反轉照𪜶邪惡的心固執背叛我；毋若無改善，顛倒閣較歹。
25 對恁的祖先出埃及到今仔日，我一再派我的僕人先知去𪜶遐。
26 毋拘𪜶猶原毋聽，毋注意聽我的話；顛倒硬心固執，比𪜶的列祖做閣較歹的事。
27 「耶利米，你著將諸個話攏給𪜶講，毋拘𪜶𣍐聽；你按怎給𪜶叫，𪜶嘛𣍐給你應。
28 你著給𪜶講：『恁此個民族毋聽趁上主 — 恁的上帝的話，毋肯受教示。恁中間無閣有真實；恁的嘴連一句誠實可靠的話都無。』」
佇欣嫩子山谷的罪惡
29 耶路撒冷啊，著剃光頭，給頭毛㧒确！
著佇樹仔剉了了的山頂唱哀歌！
上主已經將惹伊受氣的世代放拺啦！
30 猶大的人民做我看做邪惡的事，佇敬拜我的聖殿𫞼可惡的偶像，給此個殿拍垃墋。上主按呢講。
31 𪜶佇欣嫩子山谷起陀斐特的山頭壇，燒𪜶的子兒獻做祭。我毋曾命令𪜶做此款代誌，連想都毋曾想過。
32 恁著知，時日一下到，彼個所在𣍐閣叫做欣嫩子山谷抑是陀斐特，欲叫做「屠殺的山谷」。因為別位無夠所在埋葬死人，𪜶會佇陀斐特埋身屍。上主按呢宣告。
33 此個人民的屍體，會成做空中的飛鳥及地上的野獸的食物；無人來給𪜶趕走。
34 彼時，我欲互猶大的城鎮及耶路撒冷的街路完全無歡喜快樂的聲，無閣有婚宴喜慶的聲，因為此個地欲變做荒埔。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。