上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
6
耶路撒冷受圍攻
便雅憫人，著逃命！趕緊走離開耶路撒冷！著佇提哥亞歕哨角；佇伯‧哈基琳起火燻做信號！災難及嚴重的毀壞對北方迫倚來啦！
2 錫安雖然親像媠閣幼秀的女子，毋拘我欲給你毀滅。
3 親像牧者導羊群，列國的君王欲導軍隊來，佇此個城的周圍紮營攻擊伊。
4 𪜶欲下令：「準備出戰！來，趁中晝咱來去給𪜶攻擊！」有人會講：「真僫！日頭啲欲落山，啲欲暗啦。」
5 「起來！咱著透暝給攻擊，毀壞𪜶的堡壘！」
6 上主 — 萬軍的統帥按呢講：「恁著剉樹仔，造土堆，攻擊耶路撒冷。此個城充滿欺壓剝削，應該受刑罰。
7 井按怎淐水出來，此個城嘛仝款罪惡貫滿，歸個城攏會當聽著暴力及毀壞的聲；我嘛不時看著城內有病疼及傷痕。
8 耶路撒冷，你著受管教，才免我及你疏遠，互你變做荒廢無人住的所在。」
背逆的以色列
9 上主 — 萬軍的統帥按呢講：「以色列所賰的人攏會互人掠去，親像葡萄互人挽了了；你著親像挽葡萄的人，手閣伸入去葡萄藤給挽互清氣。」
10 我應講：「我若給人傳達你的話，給人警告，豈有人欲聽？𪜶給耳仔塞起來，無欲聽。𪜶將上主的話當做耍笑，一屑仔都無愛聽。
11 毋拘我滿腹攏是上主的受氣，擋𣍐牢。」
上主對我講：「你著將我的受氣摒佇街路的囝仔及結歸群的少年人身上；許個翁某、老人、長歲壽的，攏會互人掠去。
12 我欲互𪜶的厝、田園，及𪜶的某，攏變做別人的；我欲伸手攻擊此塊土地的住民。上主按呢宣告。
13 𪜶對上卑微的到上有權勢的攏數想不義之財；連先知及祭司都攏行為詭詐。
14 我的子民受著傷害，𪜶攏無要無緊。𪜶講：『平安無事！平安無事！』其實攏無平安。
15 𪜶做可惡的事，豈知見笑？𪜶實在有夠𣍐見笑！𪜶會親像別國的人互對敵刣死；我給𪜶刑罰，𪜶會完全毀滅。」上主按呢宣告。
以色列拒絕上主的道路
16 上主對伊的子民講：「恁著佇路裡注意觀察，給人問古早的路，看彼條上好的路佇叨位，就去行；按呢，恁的心神就會得著安歇。」
毋拘𪜶講：「毋！阮無欲行彼條路。」
17 上主閣給𪜶指派守望的衛兵，叫𪜶著聽哨角的聲。毋拘𪜶講：「毋！阮無欲聽。」
18 所以，上主講：「列國啊，聽咧！見證人啊，著觀察，看𪜶會抵著什麼代誌。
19 大地啊，聽咧！我欲互諸個人民受災難，這是𪜶奸奸鬼鬼的後果；𪜶毋聽趁我的話，拒絕我的律法。
20 𪜶獻示巴的乳香互我，帶真遠的所在出產的菖蒲來互我，我才無啲稀罕。恁的燒化祭，我無欲接納；恁的牲禮，我無歡喜。
21 所以，我欲給絆腳石下佇諸個人民的頭前，互父及子做夥跋倒，互厝邊及朋友攏滅亡。」
對北方來的侵略者
22 上主按呢講：「有一個民族欲對北方來；有一個強的國家對真遠的所在準備欲出征。
23 𪜶攑弓攑槍，殘忍無情；𪜶的聲親像海湧嘩嘩哮。錫安的住民啊，𪜶騎戰馬，團結同心，排陣欲攻擊你。」
24 耶路撒冷的住民講：「阮聽著𪜶的消息，手攏軟落去；阮非常痛苦，親像產婦啲催陣。
25 毋通出去野外，嘛毋通走去街路，因為一四界有武裝的對敵，攏真恐怖。」
26 上主對伊的子民講：「著穿麻衫糝火灰，著親像死孤子大聲哀哭，因為殘害性命的會忽然來攻擊恁。」
27 上主對耶利米講：「我欲互你佇我的子民中間，親像鑑定師，親像考察官，評判考驗𪜶的所做。
28 𪜶親像銅及鐵赫呢固執背叛我；造謠惹代誌，歸個腐敗了了。
29 人大力搖風櫃，爐的火燃閣較焰，給鉛燒熔；煉了閣煉，毋拘攏無採工，因為𪜶的邪惡除𣍐盡，親像鉛的雜質熔𣍐掉。
30 𪜶會互人叫做『無價值的銀』，因為上主已經給𪜶擲㧒确。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。