上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
4
呼召以色列悔改
上主講：「以色列啊，你若越倒轉，倒轉來我遮，將諸個通厭惡的偶像除掉，無閣三心兩意，
2 你若照真誠、公平、正直指永活的上主咒誓，列國就欲得著我的祝福，閣誇耀我。」
3 上主給猶大人及耶路撒冷的住民講：「恁著開墾猶未犁過的園，毋通撒種佇莿內面。
4 猶大人及耶路撒冷的住民啊，著給恁的心行割禮歸屬上主，除去恁內心的垃墋，才免我因為恁的歹行為發受氣，親像火𤏸起來，無人會當拍化。」
外國會來侵犯
5 恁著佇猶大宣告，佇耶路撒冷宣傳：
著佇全國歕哨角，大聲喝講：
「咱著集合，
走入去設防的城！」
6 著攑大旗指向錫安！
著逃命，毋通停腳！
上主欲互災禍及可怕的毀滅對北旁來。
7 毀滅列國的已經出發，
親像獅對艷艷的樹林出來。
伊欲互你的土地拋荒，
互你的城鎮荒廢，無人住。
8 所以，恁著穿麻衫，流目屎啼哭，
因為上主猶啲對咱受氣。
9 上主講：「到彼日，王及官員欲失去勇氣；祭司攏會驚惶，先知嘛會青狂。」
10 我就講：「唉啊！至高的上主，你實在欺騙諸個人民及耶路撒冷人。你講『平安無事』，其實刀劍已經抵佇阮的嚨喉。」
11 彼時諸個人民及耶路撒冷人會聽著諸個話：對無樹無草的曠野高的所在，會有燒風吹來我的子民遐；毋是欲吹麥芒，抑是給五穀的雜質吹走，
12 是受我命令吹來的強風。現在我欲宣布我的審判。
猶大受圍困
13 你看，對敵啲來親像烏雲啲絞；𪜶的戰車親像捲螺仔風，𪜶的戰馬比鷹鳥較緊。阮有災禍啦！阮無命啦！
14 耶路撒冷啊，著將你心內的邪惡洗清氣，互你通得著解救。你心內的歹念頭欲囥到底時？
15 有消息對但地區傳出來；有歹消息對以法蓮山區傳來。
16 恁著給列國傳播，給耶路撒冷宣告：有圍攻的人對真遠的所在來，大聲喝，欲攻打猶大的城鎮。
17 𪜶親像顧守園地的人包圍耶路撒冷，因為耶路撒冷背叛我。上主按呢宣告。
18 你的所做，你的行為惹起諸個事；這是你造成的惡果。此個惡果真苦，苦到你的心腸。
耶利米為同胞悲傷
19 我的腹內，我的臟腑，我的心絞疼！
我的心噗噗筅。
我無講話擋𣍐牢，
我已經聽著哨角及交戰喝喊的聲。
20 毀滅的消息繼續傳來；
全地攏受破壞。
我的布棚忽然倒去；
我的帳帷連鞭裂去。
21 我看對敵的大旗，著閣看偌久？
我聽哨角的聲，著閣聽偌久？
22 「我的子民愚戇，毋識我；
我的子兒無知，無智慧；
𪜶作歹真𠢕，作好頇顢。」
耶利米看見將來的毀滅
23 我看大地，大地渾沌無成形；
我看天，天暗淡無光。
24 我看大山，大山振動，
小山嘛搖來搖去。
25 我四界看，逐位攏無人，
飛鳥嘛攏走去匿。
26 我閣看，肥媠的園變做荒埔，
所有的城鎮攏受拆毀，
因為上主發大受氣。
27 上主按呢講：
全地攏會荒廢，
毋拘我𣍐徹底給伊毀滅。
28 大地會曠旱，
天會烏暗。
我一下講出，一定𣍐後悔；
我既然決定，一定𣍐改變。
29 城內的人聽著馬兵及射箭的人喝喊的聲
就攏逃走，
走入樹林，𬦰上山巖；
全城攏受放拺，
無人住佇彼內面。
30 你此個欲受毀壞的城，
哪著穿紅色的媠衫，
掛黃金的妝飾，
梳粧打扮，
展你的妖嬌美麗？
你按呢打扮豈有採工？
你的愛人給你放拺，
欲收拾你的性命。
31 我聽見親像產婦催陣
欲生頭上子痛疼的聲，
是錫安的住民啲嗶帕喘，
𪜶伸雙手，講：「我慘啊！
有人欲來刣我，我欲暈去啦。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。