上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
66
上帝要求的敬拜
上主按呢講：
天是我的座位；
地是我的腳砧。
恁欲佇叨位為著我起宮殿？
叨位會當做我安歇的所在？
2 諸個一切是我的手所造，
所以，諸個攏是我的。
上主按呢宣布。
我欲看顧的是
困苦、心靈痛悔、
聽著我的話就驚畏的人。
3 刣牛獻做祭，嘛刣人；
獻羊羔，嘛摃斷狗的頷頸；
獻素祭，嘛獻豬的血；
燒乳香，嘛讚美偶像；
此款人已經選定家己的路，
𪜶的心意愛通厭惡的事。
4 所以，我選定欲虐待𪜶，
互驚惶的代誌臨到𪜶。
因為我叫，無人應；
我講，𪜶毋聽。
𪜶顛倒做我看做邪惡的事，
選擇我無歡喜的代誌。
上帝為著錫安申冤
5 聽著上主的話就驚畏的人，
恁著聽伊的話。伊講：
恁家己的兄弟怨恨恁，
因為我的名的緣故棄拺恁。
𪜶講：「願上主得著榮耀，
互阮通看見恁的歡喜。」
其實，𪜶才是應該受凌辱的。
6 聽咧，城內有喧嘩的聲！
對聖殿有聲發出！
這是上主啲報應伊敵人的聲！
7 聖城猶未痛疼就生產；
錫安猶未催陣就生子。
8 啥人曾聽著此款事？
啥人曾看見諸個代誌？
豈有國家佇一日內就產生？
豈有民族佇一目𥍉久就生出來？
毋拘錫安一下開始催陣，子兒就出世。
9 上主按呢講：
我既然互人臨盆，豈會無互嬰仔生出來？
你的上帝按呢問：
我是互嬰仔出世的，豈會給母胎關起來？
10 恁諸個疼惜耶路撒冷的人，
著及伊做夥歡喜，為著伊快樂。
恁諸個為著伊悲傷的人，
著及伊做夥歡喜慶祝。
11 恁通佇伊的胸前𠲿奶得著滿足，得著安慰；
對伊充足的奶得著養飼來歡喜。
12 上主講：
「我欲互耶路撒冷繁榮，親像河流直直流；
我欲互萬國的財富親像溪水給你淹滿。
我會給你抱佇胸前互你𠲿奶，
佇腳頭窩頂及你耍，給你弄。
13 親像老母安慰伊的子，
我嘛欲安慰恁；
恁會佇耶路撒冷得著安慰。
14 恁會看見，心就歡喜；
親像草得著潤澤茂盛，恁會愈勇壯。
人攏會知，我上主的氣力及服事我的人同在；
我的受氣會對我的敵人發出。」
15 看咧，上主佇火中來臨，
伊的戰車親像捲螺仔風掃來；
伊佇大受氣中施行伊的報應，
佇火中執行伊的刑罰。
16 上主欲用火及刀審判全人類；
真多人會互上主處死。
17 上主講：「許個照異教的儀式聖別家己，潔淨家己，隨人入去園內拜偶像，食豬肉、鳥鼠、通厭惡的物的人，攏會做一下滅亡。
18 「我知𪜶的作為及意念。我欲來啦，欲將萬國以及講逐種語言的人攏集倚來；𪜶會來，會看見我的榮光。
19 我欲佇𪜶中間𫞼一個記號，閣對𪜶中間差逃脫的人去列國，就是他施、利比亞、𠢕射箭的呂底亞、土巴、希臘，閣到猶毋曾聽著我的名，毋曾看著我的榮光許個遠遠的海島。𪜶欲佇列國傳報我的榮光。
20 上主按呢講：𪜶欲對列國將恁的同胞導倒來；有的騎馬，有的坐戰車、馬車，有的騎騾、駱駝，來我的聖山耶路撒冷，做禮物獻互上主；抵親像以色列人用清氣的器具貯祭物獻佇上主的殿。
21 我嘛欲指定𪜶中間一寡人做祭司，做利未人。」上主按呢宣布。
22 上主講：
我欲造的新天新地會照我的旨意久長存在；
恁的後代及恁的名嘛會按呢久長存在。
23 每月的初一及逐個安歇日，
所有的人攏會來我面前敬拜我。
上主按呢宣布。
24 敬拜我的人出去，會看見背叛我的人的屍體；食許個屍體的蛀蟲𣍐死，燒𪜶的火𣍐化；所有的人攏會厭惡𪜶。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。