上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
63
上主刣贏列國
對以東的波斯拉城啲來，
穿紅色外袍彼位是啥人？
穿插華美，充滿威力，
大步向前邁進彼位是啥人？
「是我 — 有大氣力拯救的上主；
我來宣告勝利。」
2 是按怎你的外袍是紅色，
親像啲踏酒窟的人的衫？
3 上主講：
我家己一個佇酒窟踏葡萄，
我的子民無人及我做夥。
我佇受氣中踏列國，
佇大受氣中踐踏𪜶；
𪜶的血噴著我的外袍，
拍垃墋我所有的衫。
4 申冤的日，我已經定著，
我救贖的年嘛已經到。
5 我四界看，毋拘無一個來幫贊；
我注意看，竟然無人來協助。
所以，我靠家己的氣力施行拯救；
我的大受氣加強我的決心。
6 我佇受氣中踐踏列國的人民，
佇大受氣中拍碎𪜶；
我給𪜶的血摒佇地裡。
上主恩待以色列
7 我欲講起上主不變的疼，
欲稱讚伊為著咱所做一切的作為。
上主有照伊的恩惠及豐盛的慈愛
大大賜福互以色列家。
8 上主講：「𪜶確實是我的子民，
是𣍐行詭詐的子兒。」
按呢，伊就做𪜶的救主。
9 佇𪜶一切的苦難中，伊嘛同受苦；
伊差伊面前的使者解救𪜶。
伊用伊的疼，伊的憐憫救贖𪜶；
佇古早的時日，伊攏給𪜶抱，給𪜶揹。
10 𪜶竟然背叛，互伊聖的神憂傷；
所以上主變做𪜶的敵人，及𪜶作對。
11 彼時，𪜶才想起古早
伊的僕人摩西的日子。
𪜶問：「今，彼位將伊的子民及𪜶的領袖對海中救出來的上主佇叨位？
彼位將聖的神賜互𪜶的上主佇叨位？
12 彼位行佇摩西的正旁，
用大氣力的手骨給海水分做兩旁，
為家己建立永遠的名的上主佇叨位？
13 彼位導伊的子民過深海，
互𪜶親像馬佇曠野啲走𣍐跋倒的上主佇叨位？」
14 上主的神互伊的子民得著安歇，
親像牛群落去山谷；
你就是按呢引導你的子民，
為家己建立榮耀的名。
求憐憫的祈禱
15 求你對天頂俯落來看，
對你聖閣榮耀的所在看。
你的熱誠及你的氣力佇叨位？
你熱情的疼及憐憫佇叨位？
毋通毋插阮！
16 雖然亞伯拉罕毋識阮，
雅各毋承認阮，
毋拘你是阮的老父。
上主啊，你是阮的老父；
對古早你的稱呼是「阮的救贖主」。
17 上主啊，是按怎你互阮偏離你的道路？
是按怎互阮硬心毋敬畏你？
因為你僕人的緣故，求你回心轉意；
為著你的子民，你的產業，求你轉來！
18 你聖的子民不過暫時得著你應允的土地，
毋拘阮的對敵已經踐踏你的聖所。
19 阮假若毋曾受你統治，
假若毋曾做你的子民。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。