上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
60
耶路撒冷將來的榮耀
起來！發光！你的光已經來到！
上主的榮光已經啲照你！
2 看咧，雖然烏暗罩滿大地，
大烏暗遮蓋萬民，
毋拘上主會給你照光，
伊的榮光會佇你身上顯明。
3 萬國會來就近你的光，
列王來親近你發出的光輝。
4 著攑頭四方觀看：
你的子民聚集來到你遮；
你的子對遠遠轉來，
你的查某子若囝仔互人抱來。
5 彼時你看著諸個，就真光彩；
心激動真歡喜。
對海運來的財富會摒互你；
萬國的財寶攏變你的。
6 歸大陣的駱駝，米甸及以法的單峰駱駝攏會來，
對示巴來的嘛會帶黃金及乳香；
𪜶攏會頌讚宣揚上主。
7 所有基達的羊群攏會聚集去你遐，
所有尼拜約的綿羊會做你的路用；
諸個攏會獻佇祭壇，
成做我歡喜接納的祭物。
我上主會互我的殿的榮耀閣較輝煌。
8 許個親像歸片雲飛來，
親像粉鳥飛轉來巢裡的是啥人？
9 𪜶是對遠遠的海島聚集的船隊；
他施的船做頭，
導你的子兒對真遠的所在帶金帶銀來，
攏是為著上主 — 你的上帝，以色列神聖的上帝的名。
因為伊已經有互你得著榮耀。
10 上主對耶路撒冷講：
「外國人會重建你的城牆，
𪜶的君王會服事你。
我曾佇受氣中刑罰你，
毋拘今欲施恩憐憫你。
11 你的城門攏會不時開開，
日時暝時門攏𣍐關；
按呢，列邦會帶𪜶的財物來，
𪜶的君王導隊，排列進貢。
12 毋肯服事你的列邦及王國攏會滅亡；
許個邦國攏會徹底荒廢。
13 「黎巴嫩的榮光，
就是松樹、杉樹、黃楊樹，
攏會運來耶路撒冷，
裝飾美化我的聖所；
我嘛欲互我腳踏的所在得著榮光。
14 壓迫你許個人的後代
攏會來行禮表敬意；
所有藐視你的人會來佇你的腳下跪拜。
𪜶欲稱你做『上主的城』，
『以色列神聖的上帝的錫安』。
15 「雖然你曾受棄拺，受厭惡，
無人對你遐經過，
我欲互你有永遠的榮華，
有世世代代的歡喜！
16 你欲𠲿列國的奶，
欲飲君王的奶；
你就知我上主是你的救主，
你的救贖主，以色列的大能者。
17 「我欲提金代替銅，
提銀代替鐵；
欲用銅代替柴，
用鐵代替石頭。
我欲設立和平做你的官長，
指派公義做你的監督。
18 佇你的土地𣍐閣聽見強暴，
你的境內𣍐閣有毀滅荒廢。
你欲稱你的牆做『拯救』，
叫你的門做『讚美』。
19 「日時你無閣需要日頭的光，
暗時嘛無需要月娘的光照；
因為我上主欲做你永遠的光；
你的上帝是你的榮光。
20 你的日頭𣍐閣落山，
你的月娘𣍐匿起來。
上主欲做你永遠的光；
你悲傷的日子會煞。
21 你的人民攏會秉公行義；
𪜶會永遠繼承應允的土地。
𪜶是我親手所種所造，
互我通得著榮光。
22 上細的會變做大宗族；
上弱的會變做強國。
我是上主，
佇時機成熟的時我會真緊促成此個事。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。