上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
59
不義及欺壓會受刑罰
著知，上主的手骨毋是傷短救𣍐著人；
伊的耳孔嘛毋是傷重𣍐聽見。
2 是恁的罪惡將恁及恁的上帝隔絕；
恁的罪過互伊的面越走，毋聽恁的祈禱。
3 因為恁的手滿滿是血，指頭仔互罪惡沐著；
恁的嘴唇講白賊，恁的嘴舌講邪惡。
4 無人照公義告訴，嘛無人照誠實辯護；
𪜶攏信賴虛假，講白賊，孵毒害，生罪孽。
5 𪜶孵毒蛇卵，牽蜘蛛網，食著蛋的人一定死；
蛇卵破，一定出毒蛇。
6 𪜶經的網𣍐當做衫穿，𣍐當遮蓋家己；
𪜶的行為攏是罪惡，𪜶所做的攏是強暴。
7 𪜶的腳闖去做歹，急欲流無辜的人的血；
𪜶的心思意念攏是罪惡，行過的路攏是踐踏毀滅。
8 和平的路，𪜶毋識；𪜶行的路無正直。
𪜶為家己造彎曲的路；
行此款路的人攏無平安和平。
人民為著家己的罪反悔
9 因為按呢，以色列人民講：
「正直離開阮真遠，
公義嘛趇阮𣍐著。
阮期待光明，毋拘猶是烏暗；
阮聽候光亮，毋拘猶行佇烏暗。
10 阮若失明的人摸牆壁啲行；
佇中晝跋倒，若親像佇黃昏；
阮周圍的人攏勇壯，毋拘阮若親像死人。
11 阮親像熊啲哮，
親像粉鳥啲哀鳴。
阮向望正直，毋拘等攏無；
阮期待拯救，毋拘拯救離阮真遠。
12 阮佇你面前所犯的罪過真多；
阮的罪作證控告阮。
阮的罪過隨阮隨牢牢；
阮攏知阮的罪真重。
13 阮背逆，棄絕上主，
越轉身毋跟隨阮的上帝；
阮計謀壓迫及反叛，
心存虛假，嘴講白賊。
14 正直挫敗，
公義恬恬徛遠遠；
真理佇城門口摔倒，
誠實𣍐當入來。
15 真理尋𣍐著；
離開邪惡的人反轉受害。」
上主欲拯救伊的子民
上主看見無正直，真無歡喜。
16 伊看無人幫贊受欺壓的人，真著驚，
就用家己的氣力拯救𪜶，
用家己的公義扶持𪜶。
17 伊用公義做戰甲穿，
用拯救做頭盔戴，
用報復做衫穿，
用猛烈的受氣做外袍幔。
18 伊欲照人的行為給𪜶報應，
欲對敵人發大受氣，
給對敵報復，
對眾海島的人報應。
19 按呢，西旁的人會敬畏上主的名；
東旁的人會尊崇伊的榮光。
因為上主會親像急流的河水沖來，
伊的風啲吹，啲掃。
20 有一位救贖主會來錫安，
來到許個為家己的背叛悔改的以色列人中間。
上主按呢宣布。
21 上主給伊的子民講：「我及恁立的約是按呢：我的神及我的話攏會佇恁中間；我下佇恁嘴內的話一定𣍐離開恁的嘴，嘛𣍐離開恁的子孫及恁子子孫孫的嘴，對此時直到永遠。」上主按呢宣布。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。