上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
57
以色列拜偶像受譴責
義人受毀滅，無人關心；
敬虔的人性命受取奪，無人注意。
義人受取奪，通脫離災難。
2 行為正直的人會進入安寧，
佇眠床安然過往。
3 恁諸個行邪術的查某人的子兒，
姦夫及妓女的後代，攏進前來！
4 恁啲戲弄啥人？
啲對啥人開嘴吐舌？
恁豈毋是背逆的子兒？
豈毋是白賊的後代？
5 恁佇橡樹中間，
佇青翠的樹下面，慾火攻心；
恁佇山谷，佇石穴，
刣恁的囝仔做牲禮獻互偶像。
6 恁佇山谷中提光滑的石頭
做神明拜，
對𪜶倒酒獻祭，
恁想諸個代誌我豈會容允？
7 恁佇高閣崎的山頂囥眠床行淫；
恁上去遐獻祭。
8 恁佇門後，佇門柱邊，𫞼淫行的像；
恁放拺我，身軀褪光光，
及愛人𬦰起去大頂眠床，
用約定的價錢鬥陣睏，
滿足恁的肉慾。
9 恁帶油及真多芳水去拜摩洛。
為著欲尋神明來拜，
恁差使者去天邊海角，甚至落到陰府。
10 恁行真遠的路，真厭倦，毋拘猶無死心。
恁想講會當對恁的神明重新得著元氣，
所以無感覺厭倦。
11 恁啲驚啥人煞著講白賊？
恁竟然𣍐記得我，無給我囥佇心內！
我一直無講話，目睭放瞌瞌，
恁就毋驚我是無？
12 我欲公開恁自稱是正義行為的真相；
諸個對恁攏無利益。
13 恁哀求的時，著叫許個偶像來救恁。
風會給𪜶吹了了；
氣會給𪜶歕散去。
毋拘投靠我的人會得著應允的土地，
會當承接我的聖山。
上主應允幫贊及醫治
14 上主講：
「著建造，著建造，
為著欲轉來的子民開一條大路，
徙開路裡所有的阻礙。」
15 至高無上、永遠存在，
稱做「神聖的上帝」彼位按呢講：
「我住佇至高至聖的所在，
嘛及心痛悔謙卑的人做夥住；
我欲互謙卑的人心靈醒起來，
互心痛悔的人心神活起來。
16 我𣍐繼續控告𪜶，
嘛𣍐永遠對𪜶受氣；
我互人的心靈衰荏，
嘛會當互人有活命。
17 因為𪜶貪戀的罪，我有對𪜶受氣，
所以我處罰𪜶，棄拺𪜶。
毋拘𪜶繼續背逆，行家己的路。
18 「我有看著𪜶的所行，
猶久會給𪜶醫治。
我會引導𪜶，幫贊𪜶，
互傷心的人得著安慰，
19 互憂傷的人歡喜唱歌來謳咾。
我欲賜平安繁榮互遠及近的人。
我閣欲醫治我的子民。」
上主閣講：
20 「毋拘邪惡的人親像海湧反來反去，
攏𣍐平靜；
海水一直淐出垃墋的土糜。
21 邪惡的人無平安！」
我的上帝按呢宣告。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。