上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
51
安慰耶路撒冷
恁諸個追求正義，
尋求我上主的人啊，著聽！
著看彼塊石磐，恁就是對遐拍出來的；
注意看彼個石穴，恁就是對遐挖出來的。
2 著注意看恁的祖先亞伯拉罕，
看恁的老母莎拉。
我選召伊的時，伊干焦家己一個，
毋拘我賜福伊，互伊子孫真多。
3 上主欲安慰耶路撒冷，
安慰伊所有的荒埔。
我欲互沙漠變做親像伊甸園，
互荒埔親像上主的園；
佇園內有歡喜快樂，
有感謝謳咾的歌聲。
4 我的子民啊，注意聽我講；
我的國民啊，著俯耳孔聽我。
我欲將律法賜互萬國；
我的公義欲做萬民的光。
5 我的勝利已經逼近；
我的拯救已經發出。
我的手骨欲統治萬民。
海島攏啲聽候我來，
一直期待我來解救。
6 著攑頭看天，俯落看地；
因為天啲欲親像煙霧消散，
地親像衫穿舊去，
內面的住民親像蠓蟲死去。
毋拘我的拯救會永遠存續，
我的公義代代無窮。
7 著聽！恁諸個認識公義，
有給我的教示囥佇心內的人。
毋免驚人給恁恥笑！
毋免懍別人給恁侮辱！
8 因為蛀蟲會給𪜶吞滅，若準啲食衫；
蟲會給𪜶食了，若準啲食羊毛。
毋拘，我的公義會永遠存續，
我的拯救續到萬代。
9 上主啊，著醒起來！醒起來！
你的手骨著堅強起來！
親像早時的年日，
親像古早的時代按呢，著起來！
給拉哈伯剁做一塊一塊，
閣鑿透彼尾大海怪的豈毋是你？
10 互海及大深淵的水焦去，
佇深淵開一條路，
互得著贖回的人過去的豈毋是你？
11 按呢，上主贖回的人攏會倒轉來。
𪜶會歡頭喜面，沿路唱歌轉來耶路撒冷；
哀嘆悲傷攏消失。
12 上主講：
「是我，我才是安慰恁的上帝。
是按怎你啲驚一定會死的人？
𪜶的性命不過親像草。
13 你是按怎𣍐記得你的上主，
𣍐記得彼位搋開穹蒼，
立大地根基的造物主？
你歸日驚惶無停，
驚彼個想欲毀壞你的欺壓者受氣。
其實，伊的受氣𣍐當傷害你。
14 受掠去的人真緊就會得著解放；
𪜶𣍐死佇監牢，
嘛𣍐欠缺食物。
15 「我是上主 — 你的上帝；
我搖動海洋，互湧嘩嘩哮。
上主 — 萬軍的統帥是我的稱呼。
16 我將我的話囥佇你的嘴，
用我的手的影遮蓋你。
我搋開穹蒼，給大地下根基，
給耶路撒冷講『你是我的子民』。」
耶路撒冷𣍐閣有痛苦
17 著醒起來！醒起來！
耶路撒冷，著𬦰起來！
你有飲上主提互你大受氣的杯，
飲互人顛來顛去的酒，歸碗公飲甲焦焦。
18 伊生的子兒無一個會當給伊插啲；
伊飼大漢的兒女無一個會當給伊扶啲。
19 此兩重的災禍，你攏曾抵著，
啥人會當及你做夥悲傷？
毀壞及荒廢、飢荒及刀劍臨到，
啥人會當給你安慰？
20 你的子兒暈倒佇街路口，
親像互人網著的羚羊。
𪜶充分感受上主的大受氣，
受盡你的上帝的責備。
21 所以，恁受苦的耶路撒冷住民，
無飲酒嘛顛來顛去的人啊，著聽！
22 至高的上主，為著伊子民申冤的上帝按呢講：
「恁看，我已經對恁的手將互恁顛來顛去的杯提走；
恁毋免閣飲我大受氣的碗。
23 我欲將此碗酒提互苦楚恁的人飲；
𪜶曾給恁講：
『仆落去，互阮踏過去。』
彼時，恁的尻脊骿親像土腳，
親像街路據在𪜶踏過去。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。