上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
49
上主的僕人的使命
眾海島啊，著聽我講！
住佇真遠列國的人民啊，著注意聽！
上主佇我出世以前就揀召我，
我猶佇母胎就給我號名。
2 伊互我的嘴親像利劍，
用伊的手庇祐我，保護我。
伊互我親像磨甲金熠熠的箭，
給我藏佇伊的箭袋內面。
3 伊對我講：「以色列啊，你是我的僕人；
我欲通過你顯示我的榮耀。」
4 毋拘我講：「我的勞苦攏是空空；
我用盡氣力，攏無採工。」
猶久，上主是我的裁決者；
我一定會對上帝得著報賞。
5 我佇母胎上主就造我，
互我做伊的僕人，
通互雅各的後代倒轉來伊遐，
導以色列流亡的子民聚集倚來。
按呢，我佇上主面前會得著光榮；
我的上帝嘛成做我的氣力。
6 現在上主對我講：
「我欲互你做我的僕人，
互雅各逐支族閣復興，
給流亡的以色列人導轉來。
我欲閣互你一項重要的任務，
互你做萬國的光，
互我的拯救普及天邊海角。」
7 上主 — 以色列的救贖主，
以色列神聖的上帝按呢講：
「你此個受人藐視，互萬國痛恨，
做統治者的奴隸的人，
君王看著你會徛起來；
領袖看著你嘛會仆落去表敬意。
此個事會實現，因為上主信實，
因為以色列神聖的上帝有揀選你。」
耶路撒冷的復興
8 上主按呢講：
「佇我歡喜接納的時，我有應允你；
佇拯救的日，我有幫贊你。
我欲保護你，閣通過你及我的子民立約。
我欲互你佇已經荒廢的土地重建，閣定居。
9 我欲給受掠的人講：『恁自由啦！』
我欲給佇烏暗中的人講：『出來見光！』
𪜶會親像羊沿路有草通食；
荒廢的所在攏變做牧場。
10 𪜶𣍐枵，嘛𣍐嘴焦；
日頭及燒風𣍐傷害𪜶。
疼惜𪜶的會引導𪜶，
導𪜶到水泉邊。
11 「我欲佇所有的山嶺開大路，
給大路攏填高。
12 看咧，我的子民對真遠的所在來；
有的對北旁，有的對西旁，
嘛有一寡對希尼地方來。」
13 天啊，著歡喜唱歌！
地啊，著歡呼！
大山小山啊，著大聲唱歌！
上主欲安慰伊的子民；
伊欲憐憫伊受苦的子民。
14 毋拘耶路撒冷的住民講：
「上主已經放拺咱！
主已經𣍐記得咱啦！」
15 因為按呢，上主回答：
「老母豈會𣍐記得食奶的嬰仔，
抑是𣍐疼惜伊的親生子？
老母若會𣍐記得，我絕對𣍐！
16 你看咧，我有將你的名刻佇手心！
你的城牆不時佇我目睭前，我無可能𣍐記得！
17 「給你重建的人真緊就來；
給你拆毀的啲離開啦。
18 你攑頭四周圍看覓咧，
你的同胞攏聚集倚來，啲欲到位啦。
我指我的性命立誓：
𪜶會成做你寶貴的妝飾，
親像新娘身軀掛的珠寶。
上主按呢宣布。
19 「彼個毀壞，拋荒，荒廢的國土今確實傷細，
無夠互流亡回國的同胞住；
給你毀滅的會離開你真遠。
20 你會親耳聽著你流亡以後生的子兒講：
『此個所在傷狹；
著互阮較闊的所在通住。』
21 彼時，你佇心內會講：
『啥人給我生諸個囝仔？
我已經喪失子嘛𣍐閣生啦。
我流亡閣到處流浪，
是啥人給我養育諸個囝仔？
我孤單，家己一個；
諸個囝仔對叨位來？』」
22 至高的上主講：
「我欲對列國攑手示意，
對萬民發出信號。
𪜶會抱你的查甫子佇胸前，
揹你的查某子佇尻脊後倒轉來。
23 列王會做你的子兒的養父，
𪜶的王后會做你的兒女的奶母。
𪜶會仆落地給你跪拜，
會舐你腳裡的土粉。
按呢，你就會知我是上主；
聽候我的人一定𣍐失望見笑。」
24 你豈會當對勇士的手搶奪戰利品？
豈會當對暴君的手解救俘虜？
25 上主按呢回答：
會當！勇士的俘虜會受搶奪；
暴君的戰利品會受解救。
我欲及敵對你的人敵對；
我欲拯救你的子兒。
26 我欲互壓迫你的人食𪜶家己的肉，
飲家己的血，親像飲新酒飲甲醉。
按呢，全人類就會知：
我上主是你的救主，
你的救贖主，
是以色列的大能者。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。