上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
43
應允救贖及保護
雅各啊，創造你的上主按呢講；
以色列啊，捏造你的彼位按呢宣布：
毋免驚，因為我已經有救贖你；
我有叫你的名呼召你，你屬我。
2 你經過大水的時，我欲及你同在；
你過大河的時，水𣍐給你淹滅。
你對火中經過，一定𣍐傷著；
火焰嘛𣍐給你吞滅。
3 因為我是上主 — 你的上帝；
我是以色列神聖的上帝 — 你的救主。
我用埃及做代價給你贖回，
用衣索匹亞及西巴做你的替身。
4 因為你佇我眼中真寶貴，
我看重你，真疼你；
所以我用別人來代替你，
用萬國來交換你的性命。
5 毋免驚，我及你同在；
我欲對東方導你的後代，
對西方聚集你的子孫倒轉來。
6 我欲對北方講：放𪜶去！
給南方講：毋通扣留𪜶！
互我的子兒對真遠的所在，
我的兒女對天邊海角倒轉來。
7 所有歸我的名，屬我的人，
就是我所創造塑造，
為著我的榮光造的人，
攏會倒轉來。
以色列是上主的證人
8 上帝講：有目睭毋拘𣍐當看的，
有耳孔𣍐當聽的，
攏給𪜶導出來。
9 著召集萬國聚集做夥，
所有的人民攏聚集做堆。
所發生的事，叨一個神明曾先宣告？
過去的代誌，叨一個曾為咱預測？
著互𪜶提出證人證實𪜶講的是著，
互人民聽著會講：這是事實。
10 上主講：以色列啊，恁是我的見證人；
我有揀選恁做我的僕人。
我欲互恁識我，互恁信我，
通了解我是上帝。
佇我以前毋曾有上帝，
佇我以後嘛𣍐有。
11 只有我是上主；
我以外無別個拯救者。
12 我曾宣告，曾拯救，曾講明；
是我，毋是恁中間的別個神明。
恁是我的見證人。
上主按呢宣布。
13 我是上帝，對起頭我就是上帝；
無人會當脫離我掌握的權。
我的作為，啥人會當改變？
對巴比倫逃脫
14 以色列神聖的上帝，
上主 — 恁的救贖主按呢講：
因為恁的緣故，我已經差人去巴比倫；
我欲摃碎𪜶所有城門的門閂，
欲互迦勒底人的歡呼變做哀歌。
15 我是上主 — 恁神聖的上帝；
我是以色列的創造主 — 恁的君王。
16 古早，上主佇海中造一條路，
佇大水中開一條大路。
17 伊剿滅戰車、馬、軍隊、勇士，
互𪜶攏仆落去，𣍐當閣起來。
𪜶受消滅，親像燈火全部化去。
18 上主按呢講：
毋通只有會記得過去的事件；
毋通一直數念古早的代誌。
19 我啲欲做一項新的事，
此陣已經啲發生，恁豈毋知？
我欲佇曠野開道路，
佇沙漠開江河。
20 野獸攏會尊重我；
連豺狼及鴕鳥都尊敬我。
因為我互曠野有水，
佇焦燥的沙漠有河，
互我的選民通飲。
21 此個子民是我親手造的；
𪜶會稱讚宣揚我！
以色列犯罪
22 上主講：
雅各啊，你無求叫我；
以色列啊，你顛倒一直討厭我。
23 你並無將你的羊做燒化祭獻互我，
嘛無獻祭物對我表敬意。
我毋曾要求你獻素祭互你操勞，
嘛毋曾要求你獻乳香互你操煩。
24 你毋曾用錢買芳料互我，
嘛毋曾用一隻肥軟的牲生互我飽足。
你顛倒因為你的罪惡互我操煩，
因為你犯的罪過互我討厭。
25 只有我是上帝，我將你的罪過擦消；
我𣍐永久記牢你的罪。
26 來！咱來去上法庭，你通控告；
你提出申訴，證實你公正。
27 你第一個祖先犯罪，
你的代言人背叛我，
28 你的首領拍垃墋我的聖所。
所以，我互雅各毀滅，
互以色列受凌辱。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。