上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
29
耶路撒冷的命運
亞利伊勒，亞利伊勒，你慘啊！
大闢安營徛起的城，你慘啊！
恁一年閣一年，
節期照時慶祝。
2 毋拘，我欲互亞利伊勒抵著災難；
伊會悲傷，吐氣，
會親像啲燒的祭壇的爐。
3 我欲四圍紮營圍困你，
欲起土堆攻擊你，
起高台攻打你。
4 你會倒壞，對土底講話，
對塵埃出細細的聲；
你的聲會親像牽亡的的聲對土腳底出來，
親像鳥仔啾啾叫的聲對塵埃出來。
5 你的敵人會親像幼的土粉，
強暴的兵士會親像互風吹的粗糠赫多。
一時仔久，忽然間，
6 上主 — 萬軍的統帥
會用雷公熠爁、地動、
狂風暴雨，及吞滅的火刑罰敵人。
7 彼時，攻擊亞利伊勒列國的兵士，
所有啲攻擊伊的城堡，圍困伊的，
會變做一個夢，
親像夜間的異象消失。
8 𪜶親像枵餓的人夢見啲食物件，
睏醒猶啲枵；
親像嘴焦的人夢見啲飲水，
睏醒猶厭倦，嘴焦。
所有攻擊錫安山列國的兵士攏會按呢。
警告無受接受
9 恁愛做戇人，出在恁倲戇！
恁愛睛瞑，出在恁睛瞑！
恁醉茫茫，毋是因為飲酒；
恁顛來顛去，毋是因為厚酒。
10 上主有給恁灌入重眠的神，
給恁的目睭，就是先知，掩起來，
給恁的頭殼，就是先見，蓋起來。
11 因為按呢，所有的默示對恁看起來是封密的冊。此本冊提互識字的人請伊讀，伊會講：「我𣍐當讀，因為冊封啲。」
12 提互毋識字的人請伊讀，伊會講：「我毋識字。」
13 主講：「此個子民用嘴親近我，
用嘴唇尊敬我；
毋拘𪜶的心離開我遠遠，
𪜶敬畏我不過是照人留落來的教示。
14 所以，我欲佇人民中間做一項奇異閣奇妙的事：
𪜶智慧的人的智慧會消無，
聰明的人的聰明會消失。」
對將來的向望
15 慘啊，許個想欲對上主掩蓋𪜶的陰謀的人！
𪜶佇暗中做代誌，講：
「啥人看會著咱，啥人會知？」
16 恁顛倒是非！
恁欲給燒瓷師傅看做黏土是無？
受造的豈會當對造伊的講「你無造我」？
瓷豈會當對燒瓷師傅講「你攏毋識」？
17 閣無偌久，
黎巴嫩會變做肥的田園，
肥的田園會親像樹林。
18 佇彼日，失聰的人會聽見冊內面的話；
失明的人佇濛霧烏暗中會看見。
19 卑微的人會因為上主加添喜樂；
散赤的人會高舉以色列神聖的上帝。
20 因為強暴的人會消失，
藐視上帝的人會無去，
當等欲做歹的人會滅亡。
21 𪜶用無事實的話害人受定罪，
給佇城門口判案的人設羅網，
閣用假見證陷害正直的人。
22 所以，彼位曾救贖亞伯拉罕的上主對以色列人民按呢講：
「以色列𣍐閣受恥辱；
𪜶的面容𣍐閣再青筍筍。
23 當𪜶的子孫看著我佇𪜶中間的所做，
𪜶會尊我的名做聖，
會尊雅各神聖的上帝做聖，
會敬畏以色列的上帝。
24 愚戇的人會曉悟；
嗷嗷唸的人會接受教示。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。