上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
22
有關耶路撒冷的信息
這是有關異象山谷的信息。
是按怎恁攏𬦰上厝尾頂？
2 恁此個充滿鬧熱喧嘩的城市，
恁中間死去的人毋是互刀劍刣死，
嘛毋是佇戰爭中死亡。
3 恁所有的官長歸陣逃走，
無一個開弓射箭。
戰士雖然走真遠，
嘛互人尋著，做一下掠去。
4 所以，我講：「插我，
互我痛心啼哭。
毋通想欲給我安慰，
我的同胞攏滅亡啦！」
5 這是至高上主 — 萬軍的統帥
互異象山谷驚惶、混亂、受踐踏的日；
佇彼日城受攻破，
哀叫的聲響遍山間。
6 以攔的兵騎馬，坐戰車，帶箭袋來進攻，
吉珥的兵將盾牌㧣出來。
7 你上媠的山谷戰車滿滿是，
馬兵佇城門口排陣。
8 猶大所有的防衛攏失效。
佇彼日，恁期待黎巴嫩林宮提供武器。
9 恁發覺大闢城有真多破隙，就佇下池積聚水。
10 恁點算耶路撒冷的厝，拆厝來修補城牆，互牆較好防備。
11 恁佇兩個城牆中間造水窟，通積聚舊水池的水。毋拘，恁攏無倚靠造此個城的上帝，嘛無給對古早就計劃此項代誌彼位看在眼內。
12 佇彼日，至高上主 — 萬軍的統帥叫恁
著啼哭悲傷，
著剃光頭穿麻衫。
13 毋拘恁狂歡宴樂，
刣牛刣羊，大食大飲。
恁講：「咱來食來飲，
因為明仔載咱都欲死啊！」
14 上主 — 萬軍的統帥親身給我啟示講：
「此個罪，到恁死，我一定𣍐赦免！」
至高上主 — 萬軍的統帥按呢宣布。
對舍伯那的警告
15 至高上主 — 萬軍的統帥按呢講：「你去見宮廷財務總管舍伯那，給伊講：
16 『你佇遮啲創啥？啥人互你權柄佇遮為你家己拍墳墓，佇高的巖石中造一個安歇的所在？
17-18 你看起來假若真了不起，毋拘上主欲給你掠起來，給你搦歸丸親像球，㧒去真遠的所在。你會死佇遐，你掠做誇耀的戰車嘛會放佇遐。你會成做你主人的家的見笑。
19 我欲撤你的職，剝你的位。
20 「『佇彼日，我欲給我的僕人希勒家的子以利亞敬召來。
21 我欲將你的外袍互伊穿，將你的腰帶互伊縖，將你的權柄交互伊。伊欲親像老父看顧耶路撒冷的住民及猶大人民。
22 我欲將大闢王朝的鎖匙囥佇伊的肩頭頂；伊開，就無人會當關；伊關，就無人會當開。
23 我欲給伊安置佇穩固的地位，親像杙仔釘真牢。伊欲成做𪜶老父的家的榮耀。
24 伊的家族，對子到孫的擔頭，親像坩仔鍋仔，攏掛佇伊身上。』」
25 上主 — 萬軍的統帥講：「佇彼日，釘佇堅固所在的杙仔會冗去，落去。伊揹的重擔會無去！」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。