上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
13
上帝欲處罰巴比倫
這是亞摩斯的子以賽亞對上帝所領受有關巴比倫的信息。
2 著佇光禿禿的山頂𫞼一支大旗，
對戰士發號令；
著給𪜶搧手，
互𪜶進入貴族的門。
3 我有命令特別揀出來的人，
有選召耀武揚威的勇士，
來執行我的受氣。
4 聽咧，山頂有喧嘩的聲，
若親像一大隊軍兵啲聚集！
聽咧，有萬國集合吵鬧的聲！
上主 — 萬軍的統帥啲召集軍隊備戰。
5 𪜶對遙遠的所在，
對地的彼旁來；
𪜶是上主受氣用的武器，
欲毀壞全地。
6 恁著大聲哀哭，因為上主的日近啦；
全能者施行毀滅的時到啦！
7 所有的手骨攏會痠軟無力，
人的心會消熔失膽。
8 𪜶攏會互恐惶充滿，
互痛疼艱苦擒啲。
𪜶會親像產婦催陣，攪絞痛疼，
因為恐怖卬愕，互相相來相去；
𪜶攏驚甲面青筍筍。
9 看咧，上主的日啲欲到啊！
有殘酷、憤怒，及大受氣，
欲互大地荒廢，
互地上的罪人受毀滅。
10 天頂的星辰天體攏𣍐發光。
日頭一下出來隨時變烏暗，
月娘嘛暗淡無光。
11 上主講：
「我欲因為人的邪惡刑罰世界，
因為𪜶的罪惡給𪜶處罰。
我欲終止驕傲的人的自高，
欲制伏暴君的猖狂。
12 我會互人比上等的金較少，
比俄斐的純金閣較稀罕。
13 我上主 — 萬軍的統帥憤怒的時，
發大受氣彼日，
欲互天搖泏，
互大地振動，離開原位。
14 「彼時，𪜶會親像受追趕的鹿仔，
親像無牧者看顧的羊，
每一個人攏會轉去家己的同胞遐，
逐個人逃走轉去家己的故鄉。
15 互人趇著的，會互槍鑿死；
互人掠著的，會互刀刣死。
16 𪜶的嬰仔會佇𪜶面前
互人摔甲碎糊糊。
𪜶的厝會互人搶劫；
𪜶的某受侮辱。
17 「看咧，我欲煽動米底亞人起來攻擊𪜶；
米底亞人無看重銀，嘛無愛金。
18 𪜶的弓箭會射倒少年人；
𪜶𣍐憐憫腹肚內的嬰仔，
嘛𣍐保惜囝仔的性命。
19 巴比倫原本是列國的榮光，
迦勒底人誇口的榮耀，
毋拘𪜶會互上帝捙倒，
抵親像所多瑪及蛾摩拉受毀滅。
20 巴比倫𣍐閣有人住，
代代𣍐閣有人徛起。
無半個阿拉伯人會佇遐搭布棚，
顧羊的嘛𣍐導羊群去遐歇睏。
21 毋拘，曠野的走獸會來倒佇遐，
佇遐的厝有真多暗光鳥。
鴕鳥會佇遐作巢，
野山羊佇遐跳舞。
22 豺狼會佇𪜶的堡壘呼狗螺，
𪜶奢華的宮殿有豺狼啲哮。
巴比倫的結局已經逼近；
伊滅亡的日𣍐閣延遲！
伊的日無久啦！」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。