上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
10 慘啊，許個制定不義的法律，
寫判決書欺壓我的子民的人！
2 恁剝削散赤人的權益，
剝奪困苦人應有的公正，
將寡婦做恁的獵物，
孤兒做恁的戰利品。
3 佇審判的日，災難對遙遠的所在來的時，
恁欲按怎？
恁欲對啥人求幫贊？
恁的財富欲留互啥人？
4 恁只有屈佇俘虜中間，
抑是受殺害倒佇屍體中。
雖然是按呢，上主的受氣猶未煞；
伊的手猶伸長長欲處罰恁。
亞述王做上帝的器具
5 慘啊，亞述！我受氣的棍，
我手中所攑受氣的柺。
6 我命令伊去對付無法無天的國民，
派伊去攻擊我所痛恨的人民；
搶𪜶的戰利品，奪𪜶搶奪的物，
閣踐踏𪜶，親像啲蹋街路的路糊糜。
7 毋拘這毋是亞述的計劃，
伊的目的毋是干焦按呢。
伊存心欲毀滅閣較多的國家。
8 伊誇口講：
「我的指揮官逐個攏是將才。
9 我有征服迦勒挪，嘛有征服迦基米施。
我有征服哈馬，嘛有征服亞珥拔。
我有征服撒馬利亞，嘛有征服大馬士革。
10 我的手已經伸到拜偶像的國家；
𪜶的偶像比耶路撒冷及撒馬利亞的偶像較多。
11 我豈毋免對付耶路撒冷及伊的偶像，
親像我有對付撒馬利亞及伊的偶像？」
12 主佇錫安山及耶路撒冷完成伊欲做一切的工作了後，欲處罰自高自大的亞述王及伊的驕傲。
13 因為伊講：
「我靠家己的氣力及智慧完成此個事，
因為我真有本事。
我有廢除國及國之間的境界，
搶奪𪜶的財寶。
我親像勇士制伏君王。
14 我的手有搙著人的財富，
若啲提鳥仔巢。
我得著全地，
親像拾著留落來的鳥仔卵；
𣍐有鳥仔翼給我嚇驚，
嘛無鳥仔開嘴啾啾叫反抗。」
15 斧頭豈通對用伊剉柴的人誇口？
鋸仔豈通展伊比拖鋸仔的較𠢕？
是人啲用棍仔，毋是棍仔啲用人！
16 所以，至高上主 — 萬軍的統帥
欲互勇壯的人病甲消瘦落肉，
欲點火給𪜶的榮華燒掉。
17 彼時，以色列的光會變做火，
伊神聖的上帝變做火焰，
佇一日內給親像莿及野草的亞述王燒滅。
18 伊茂盛的樹林及真肥的田園會徹底受毀壞，
親像病人衰弱，死去，消失。
19 樹林內賰落來的樹真少，
連囝仔都會曉算。
無幾個會倒轉來
20 佇彼日，以色列所賰的子民，雅各的後代死無了的人𣍐閣去倚靠攻擊𪜶的人；𪜶欲堅定倚靠上主 — 以色列神聖的上帝。
21 雅各的後代所賰的人會倒轉去大權能的上帝遐。
22 雖然你的子民以色列親像海邊的沙赫多，𪜶中間只有賰幾個仔會轉來。毀滅的事已經決定，因為上主大大施行公義。
23 按呢，至高上主 — 萬軍的統帥照伊所決定，欲徹底毀壞全地。
上主欲刑罰亞述
24 至高上主 — 萬軍的統帥確實有按呢講：「住佇錫安我的子民啊，雖然亞述用柺給恁拍，親像埃及用棍給恁摃，恁毋免驚；
25 因為我對恁的受氣連鞭會煞，我的受氣是欲互亞述滅亡。」
26 後來上主 — 萬軍的統帥會攑伊的鞭捽𪜶，親像伊佇俄立的石磐鞭拍米甸。伊欲伸伊的柺仔佇海的頂面，親像伊佇埃及有按呢做。
27 佇彼日，亞述下的重擔欲對恁的肩頭徙走，下佇恁頷頸的軛欲摃斷。
侵略者進攻
28 亞述攻佔艾城，
經過米磯崙，
下補給品佇密抹。
29 𪜶經過隘口，
佇迦巴過暝。
拉瑪人皮皮惙，
掃羅故鄉的基比亞人逃走。
30 迦琳的住民啊，著大聲喝；
萊煞人啊，著聽；
亞拿突人啊，著應答。
31 瑪得米那人逃走；
基柄的住民逃命。
32 彼日，亞述王會佇挪伯停啲排陣；
伊欲動手攻擊錫安山，
就是耶路撒冷的山。
33 看咧，至高上主 — 萬軍的統帥
欲用通驚的力量剉斷樹枝；
大欉樹會受斬斷，
粗閣勇的樹攏會倒甲平平平。
34 伊欲用斧頭剉平樹林，
連黎巴嫩上好的樹都倒了了。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。