雅歌
8 你若是我的兄弟，
𠲿過阮老母的奶，毋知偌好！
按呢，我佇外面抵著你，及你唚嘴，
就無人會看輕我。
2 我會導你入去阮老母的厝，
伊會教示我；
我會互你飲調和的酒及石榴的汁。
3 你用倒手扶我的頭殼，
用正手攬我。
4 耶路撒冷的查某囝仔啊，
我懇切給恁吩咐，
毋通拍醒，毋通攪擾阮的愛情，
到阮歡喜滿足。
(耶路撒冷的查某囝仔)
5 對曠野上來，
撐佇伊親愛的的身軀彼個是啥人？
(女)
我佇蘋果樹腳給你叫醒；
你的老母佇遐懷孕，
佇遐經過催陣的痛苦生你。
6 互我親像印，蓋佇你的心內；
親像印，頓佇你的手骨。
因為愛情親像死赫呢有力，
情熱親像陰府赫呢強烈，
所發出的炎熱親像火焰，
親像極猛烈的火焰。
7 大水𣍐當拍化愛情；
溪水𣍐當給伊消滅。
人若用伊所有的財產來買愛情，
一定互人藐視。
(女的兄弟)
8 阮有一個細漢小妹，伊的奶猶未發育成熟；
人來提親，
阮著按怎給伊設法？
9 伊若是牆，阮欲佇伊的頂面起銀塔；
伊若是門，阮欲用柏香柴板給伊圍起來。
(女)
10 我是牆，我的奶親像兩個塔；
我親愛的一下看著我，就心滿意足。
(男)
11 所羅門佇巴力‧哈們有一坵葡萄園；
伊將此坵葡萄園租互顧守的人；
𪜶逐個人為著𪜶的果子著納一千個銀。
12 我有葡萄園，是我家己的；
所羅門啊，彼一千你提去，
兩百互顧守果子的人。
13 𫢶佇園內的查某囝仔啊，同伴攏啲聽你的聲，
你嘛互我聽一下。
(女)
14 我親愛的啊，趕緊來，
親像羚羊，
親像鹿仔，
來到淐出芳味的山！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋