上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
傳道書
7
智慧及愚戇的差別
好名聲贏過好的芳油；人死的日比出世的日較好。
2 去喪事的家比去宴樂的家較好，因為死是眾人的結局；活人嘛著將此個代誌囥佇心內。
3 憂悶比笑較好；因為面帶憂容對心有好處。
4 智慧的人的心佇喪事的家；愚戇的人的心佇快樂的家。
5 聽智慧人的責備，比聽愚戇的人的稱讚較好。
6 戇人的笑親像鼎下燒刺仔啲𤏸的聲；這嘛是空虛。
7 恐嚇取財會互智慧的人變做戇；賄賂會互人的心腐敗。
8 代誌的結局比代誌的開始較好；吞忍比驕傲較好。
9 毋通隨便受氣，因為受氣是愚戇。
10 毋通講：是按怎以前比現在較好？按呢問是無智慧。
11 智慧及家業攏是好；對活佇日光下面的人攏有利益。
12 因為智慧會致蔭人，錢銀嘛會致蔭人；毋拘只有智慧會保全有智慧的人的性命。這就是有智識的好處。
13 你著想上帝的作為；上帝互伊彎的，啥人會當互伊直？
14 順境的時著歡喜，患難的時著想：此兩項攏是上帝的作為，是欲互人查𣍐出將來會發生什麼代誌。
15 佇空虛的人生我有看著：有義人做好顛倒滅亡，有歹人做歹顛倒食長歲壽。
16 毋通過頭做好，毋通過頭聰明；哪著毀滅家己？
17 毋通過頭做歹，嘛毋通做戇人；哪著時未到就死？
18 你掠牢此頭，彼頭嘛毋通放去；敬畏上帝的人會曉雙頭兼顧。
19 智慧會互智慧的人有能力贏過城內十個掌權者。
20 世間無一個只有行善無犯罪的義人。
21 別人講的話毋通攏囥佇心內；你可能會聽著你的僕人給你咒罵，
22 因為你家己知，你嘛曾真多遍咒罵別人。
23 諸個代誌，我曾用智慧試驗；我講：我欲做有智慧的人；毋拘智慧離開我真遠。
24 智慧遠閣深，豈有人尋會著？
25 我一心一意愛知，愛查考，愛尋求智慧及萬有存在的理由，通知邪惡是愚戇，愚蠢是癲狂。
26 我閣發見，歹的查某人比死較恐怖；伊是活罩，伊的心是羅網，手是鎖鍊。上帝意愛的人攏會當閃避，毋拘邪惡的人會互伊掠著。
27 傳道者講：看咧，我愛知萬有存在的理由，一項一項給伊比較，就尋著此個 —
28 我一直啲尋，猶尋𣍐著 — 佇一千人的中間我尋會著一個查甫人是正直，毋拘連一個正直的查某人都尋𣍐著。
29 看咧，我只有尋著此個，就是上帝創造的人本來是正直，總是𪜶想出真多詭計。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。