上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
7 上主對摩西講：「我欲互你佇埃及王的面前親像上帝；你的兄哥亞倫欲做你的代言人。
2 我命令你的，你攏著講；你的兄哥亞倫著給埃及王講，著放以色列人離開伊的地。
3 我欲互埃及王的心硬，閣欲佇埃及地行真多神跡奇事。
4 毋拘埃及王無欲聽恁，我就欲攻擊埃及，嚴嚴刑罰𪜶，導我的子民以色列一隊一隊出埃及地。
5 我伸手攻擊埃及，導以色列人對𪜶中間出來的時，埃及人就會知我是上主。」
6 摩西及亞倫就照上主的吩咐去做。
7 𪜶及埃及王講話的時，摩西八十歲，亞倫八十三歲。
亞倫的柺仔
8 上主對摩西及亞倫講：
9 「埃及王若給恁講『行一件奇事來看覓咧』，你著叫亞倫給伊的柺仔擲佇埃及王的面前，柺仔會變做蛇。」
10 摩西及亞倫入去見埃及王，照上主的吩咐做；亞倫將伊的柺仔㧒佇埃及王及伊的人臣的面前，柺仔就變做蛇。
11 埃及王就召有智慧的人及法師來；諸個埃及的術士用𪜶的法術嘛按呢做。
12 𪜶逐個人將柺仔㧒落去，柺仔攏變做蛇；毋拘亞倫的柺仔吞食𪜶的柺仔。
13 總是埃及王的心硬，毋聽𪜶的話，抵抵照上主講的。
埃及受災難
14 上主對摩西講：「埃及王的心固執，毋肯放我的子民離開。
15 明仔早起，埃及王會去尼羅河；你著攑彼支曾變做蛇的柺仔，佇河邊等伊。
16 你著對伊講：『上主 — 希伯來人的上帝派我來對你講：著放我的子民離開，互𪜶去曠野敬拜我；毋拘到今你攏毋聽。
17 上主按呢講：我欲用我的柺仔拍尼羅河的河水，水會變做血；按呢，你就會知我是上主。
18 河裡的魚會死，水會臭；埃及人𣍐當閣飲尼羅河的水。』」
19 上主閣對摩西講：「你著給亞倫講：『攑你的柺仔，指埃及的河及溪，水池及蓄水池，互所有的水攏變做血；埃及全地，連水桶及石甕的水嘛攏變做血。』」
20 摩西及亞倫照上主的命令去做。亞倫佇埃及王及伊的人臣面前攑柺仔拍尼羅河的水；河裡的水攏變做血。
21 河裡的魚攏死，河水生臭味，埃及人𣍐當飲河裡的水；埃及全地攏有血。
22 埃及的術士用𪜶的法術嘛按呢做。埃及王的心硬，毋聽摩西及亞倫，抵抵照上主講的。
23 埃及王倒轉去王宮，無將此個事囥佇心內。
24 所有的埃及人佇尼羅河河邊挖窟仔尋水飲，因為河的水𣍐飲得。
25 上主拍尼羅河了後，此個災難繼續七日。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。