上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
145 大闢謳咾的詩。
頌讚的詩
我的上帝我的王啊，我欲尊你做至高；
我欲永永遠遠稱讚你的名。
2 我欲日日稱讚你，
欲永遠謳咾你的名。
3 上主至大，應該受大稱讚；
伊的偉大無法度測度。
4 此代欲對彼代稱讚你的作為，
欲報揚你大權能的所做。
5 人欲講起你尊貴榮光的威嚴；
我欲數念你奇妙的作為。
6 人欲講起你通驚畏的大權能；
我欲報揚你偉大的作為。
7 𪜶欲報揚你極大的恩惠，
欲唱歌謳咾你的公義。
8 上主有恩惠，有憐憫，
無快受氣，有大慈愛。
9 上主疼惜萬有；
伊的憐憫普及伊所造的一切。
10 上主啊，你所造的一切欲感謝你；
你聖的子民嘛欲稱讚你。
11 𪜶欲講起你國度的榮光，
談論你的大權能，
12 通互世間人知你大權能的作為，
知你國度的威嚴及榮光。
13 你的國度永遠存在；
你執掌的權柄續到萬代。
上主一切的應允信實可靠；
伊疼惜伊所造的一切。
14 跋倒失敗的人，上主扶持𪜶；
受壓制的人，伊扶𪜶起來。
15 所有的活物攏仰望你；
你照時互𪜶食物。
16 你搋開手，
互所有的活物攏照所愛得著飽足。
17 上主一切的所做攏公正；
伊的作為充滿仁慈。
18 所有求叫上主的人，伊及𪜶親近；
伊親近誠實求叫伊的人。
19 敬畏伊的人，伊會互𪜶的心願實現，
閣會聽𪜶的求叫，來拯救𪜶。
20 上主保護所有疼伊的人；
毋拘做歹的人，伊會給𪜶消滅。
21 我的嘴欲講出稱讚上主的話；
願一切有性命的，攏永永遠遠稱讚伊的聖名。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。