上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
2
摩西出世
有一個利未支族的查甫人娶仝支族的女子做某。
2 此個婦仁人懷孕，生一個後生，看伊真古錐，就給伊藏三月日。
3 後來，婦仁人無法度閣藏，就提一個蒲草做的籃仔，用打馬膠及柏油糊互伊𣍐洩水，將嬰仔囥佇內面，然後將籃仔囥佇尼羅河邊的蘆葦中間。
4 嬰仔的大姊徛佇遠遠的所在，愛欲知伊會抵著什麼代誌。
5 埃及王的查某子來到尼羅河邊欲洗身軀；伊許個宮女佇河邊行來行去。公主看著蘆葦中間有一個籃仔，就差宮女去提彼個籃仔。
6 伊一下拍開，看著一個嬰仔；啊，查甫嬰仔啲哮。伊真毋甘，講：「此個一定是希伯來人的嬰仔。」
7 嬰仔的阿姊來對埃及王的查某子講：「我來為你佇希伯來婦仁人的中間尋一個奶母，給你育此個囝仔好無？」
8 埃及王的查某子應講：「好，你去。」查某囝仔就去叫嬰仔的老母來。
9 埃及王的查某子給嬰仔的老母講：「你給此個嬰仔抱去育，我會互你工錢。」婦仁人就給此個嬰仔抱去，給伊育。
10 此個嬰仔大漢，婦仁人給伊導去互埃及王的查某子。埃及王的查某子就收此個囝仔做子，給伊號名叫做摩西，講：「我給伊對水裡扭出來」。
摩西流亡米甸
11 後來，摩西大漢；伊出去伊的同胞希伯來人遐，看著𪜶啲做苦工；閣看著一個埃及人啲拍希伯來人。
12 摩西看邊仔攏無人，就拍死彼個埃及人，用沙給伊蓋啲。
13 隔日，摩西閣出去，看著兩個希伯來人啲相拍。伊對彼個無理的講：「你是按怎拍家己的同胞？」
14 彼個人講：「啥人派你做首領來審判阮？你按算欲給我拍死，親像拍死彼個埃及人是無？」摩西驚一趒，想講「此個代誌人一定知啦」。
15 埃及王聽著此個代誌，欲刣摩西。摩西閃避埃及王，走去米甸，住佇遐。
有一日，摩西坐佇井邊；
16 米甸的祭司有七個查某子；𪜶來汲水，給水槽倒淀，欲互𪜶老父的羊群飲。
17 有顧羊的來，給𪜶趕走；摩西就起來給𪜶解救，互𪜶的羊群飲水。
18 𪜶轉來𪜶老父葉特羅遐，𪜶老父講：「今仔日恁哪赫早就倒來？」
19 𪜶應講：「有一個埃及人解救阮，給許個欺負阮的顧羊的趕走，甚至閣汲水互羊群飲。」
20 老父對伊的查某子講：「彼個人佇叨位？恁是按怎給伊放佇遐？去請伊來做夥食飯。」
21 摩西接受邀請，歡喜及葉特羅住做夥。葉特羅將伊的查某子西坡拉嫁互摩西。
22 西坡拉生一個後生；摩西給伊號名叫做革舜，講：「我寄居佇外邦。」
23 幾若年後，埃及王死。以色列人因為做苦工，吐氣哀叫。𪜶做苦工哀叫的聲透到上帝遐。
24 上帝聽著𪜶哼哼呻的聲，就想起伊及亞伯拉罕、以撒、雅各所立的約。
25 上帝看顧以色列人，嘛關心𪜶。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。