上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
1
以色列人生湠真多
雅各的子兒逐個導𪜶的家眷，及雅各做夥來到埃及，𪜶的名是：
2 呂便、西緬、利未、猶大、
3 以薩迦、西布倫、便雅憫、
4 但、拿弗他利、迦得，及亞設。
5 雅各的後代攏總七十人；約瑟已經佇埃及。
6 約瑟及伊的兄弟，以及𪜶彼代的人攏死。
7 毋拘以色列人生湠真多，非常強盛，遍滿彼個地。
以色列人受迫害
8 後來，埃及有毋識約瑟的新的王起來統治。
9 伊給伊的人民講：「看咧，以色列民族比咱較多，閣較強；
10 咱著想一個好辦法來對付𪜶，才免𪜶人口加添，戰爭發生的時，聯合咱的對敵給咱攻擊，離開此個地。」
11 埃及人就派督工管轄𪜶，強迫𪜶做苦工壓迫𪜶，互𪜶佇比東及蘭塞為埃及王起囤積物資的城。
12 毋拘埃及人愈給𪜶壓迫，𪜶人口愈多，擴展愈闊。對按呢，埃及人愈驚以色列人。
13 埃及人強迫以色列人做苦工，
14 互𪜶生活困苦；無論抄黏土，做磚，抑是佇野地做工，埃及人攏嚴轄對待𪜶。
15 埃及王命令希伯來的產婆，一個叫做施弗拉，一個叫做普阿，
16 講：「恁給希伯來的婦仁人接生，𪜶欲生的時，恁若看著查甫的，著互伊死；若是查某的，就互伊活。」
17 毋拘產婆敬畏上帝，無照埃及王的命令去做；𪜶留查甫嬰仔的性命。
18 埃及王叫產婆來，給𪜶講：「恁是按怎留查甫嬰仔的性命？」
19 產婆對埃及王講：「希伯來婦仁人及埃及婦仁人無仝款；𪜶較勇，產婆猶未到，𪜶就生啦。」
20 上帝好款待此兩個產婆；以色列民族人口愈多，愈強盛。
21 此兩個產婆敬畏上帝，上帝就互𪜶建立家庭。
22 埃及王命令所有的人民講：「著給希伯來人生的查甫嬰仔擲落去尼羅河，干焦互𪜶的查某嬰仔活啲。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。