上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
71
老人的祈禱
上主啊，我倚靠你；
求你互我永遠𣍐抵著見笑。
2 求你照你的公義拯救我，解放我；
求你俯耳孔聽我，救我。
3 求你做我徛起的石磐，互我通時常𫢶遐。
你已經決定欲救我；
你是我的避難所，我的堡壘。
4 我的上帝啊，求你救我脫離歹人的手，
脫離不義及殘忍的人的手頭。
5 至高的上主啊，你是我的向望；
對我少年的時，你一直是我的倚靠。
6 我對胎裡就受你扶持；
互我出老母的腹肚的，是你；
我欲不時稱讚你。
7 真多人看我做奇怪；
毋拘你是我堅固的避難所。
8 我的嘴充滿對你的稱讚，
歸日歸榮光互你。
9 我年老的時，求你毋通放拺我；
我氣力衰荏的時，求你毋通離開我。
10 我的對敵議論我；
當等欲害我性命的人啲參詳，
11 講：「上帝已經給伊放拺；
今來追伊，來掠伊；因為無人欲救伊。」
12 上帝啊，求你毋通放我遠遠毋插我；
我的上帝啊，求你趕緊來幫贊我。
13 願控告我的人抵著見笑滅亡；
願計謀欲害我的人受凌辱漏氣。
14 毋拘我欲時常仰望你，
欲一直稱讚你。
15 雖然你公義的所做及拯救的作為算𣍐了，
猶久我的嘴歸日欲宣揚。
16 我欲講起至高上主大權能的事，
干焦欲宣揚你的公義。
17 上帝啊，對我少年的時你就教示我，
現在我猶啲報揚你奇妙的作為。
18 上帝啊，到我年老，頭毛白的時，求你毋通放拺我，
互我通將你的氣力傳互下一代，
將你的大權能指示將來的人。
19 上帝啊，你的公義高到抵天；
上帝啊，你有行偉大的事，
啥人會當及你比？
20 你互我經歷真多大災難，
猶久欲互我閣活起來，
對地下上深的所在閣起來。
21 你會將尊榮加添互我，
閣再安慰我。
22 我的上帝，我欲彈瑟稱讚你，
稱讚你的信實。
以色列神聖的上帝，
我欲彈琴稱讚你。
23 我是你所救贖的，
我欲用全性命大聲唱歌稱讚你。
24 我的舌欲歸日講起你的公義，
因為計謀欲害我的人已經受凌辱見笑。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。