上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
69 大闢的詩，交互聖樂長；調，用「百合花」。
祈求幫贊
上帝啊，求你救我，
因為水已經淹到我的頷頸。
2 我陷落去深的土糜，腳踏𣍐著實地；
我落到深的水內，大水淹密我。
3 我因為喉叫厭倦，我的嚨喉焦去；
我因為聽候上帝，目睭花。
4 無理由怨恨我的人比我的頭毛較多；
無緣無故對敵我欲毀滅我的人非常強猛。
我無偷提，竟然著還。
5 上帝啊，你知我偌呢愚戇；
我無對你隱瞞我的罪過。
6 至高上主 — 萬軍的統帥，
求你毋通互仰望你的人因為我致到見笑；
以色列的上帝啊，
求你毋通互尋求你的人因為我受凌辱。
7 我為著你的緣故受詈罵，
滿面見笑。
8 我的兄弟看我做生份人；
我的同胞看我做外國人。
9 我為著你的殿心火熱，歸個人攏互吞落去；
詈罵你的人的詈罵攏落佇我身上。
10 我痛心流目屎，禁食，
反轉受眾人凌辱。
11 我用麻布做衫穿；
人反轉用我做笑談。
12 坐佇城門口的人用我做話題；
醉漢用我做歌曲。
13 毋拘我受接納的時，上主啊，我對你祈禱；
上帝啊，求你照你豐盛的慈愛，
照你真實可靠的拯救來應我。
14 求你救我脫出土糜，互我無沉落去；
求你救我脫離怨恨我的人，互我脫出深的水。
15 求你毋通容允大水淹密我；
毋通容允深淵吞食我，
毋通容允陷坑蓋密我。
16 上主啊，因為你有至大的慈愛，求你應我；
求你照你豐盛的慈悲越過來看我。
17 毋通面越走毋看你的僕人；
我佇患難的中間，求你趕緊來應我。
18 求你倚近我來救贖我；
求你救我脫離我的對敵。
19 我受著的詈罵、見笑、凌辱，你攏知；
敵對我的人你攏識。
20 詈罵互我的心碎，互我充滿憂悶。
我向望人同情，毋拘一個都無；
向望人安慰，嘛尋無。
21 𪜶提苦膽互我做食物；
我嘴焦，𪜶用醋互我飲。
22 願𪜶的宴席變做𪜶家己的羅網；
願𪜶的繁榮安定變做陷阱。
23 願𪜶的目睭花，𣍐看見；
願你互𪜶的腰惙𣍐停。
24 願你的痛恨摒佇𪜶的身上，
互你烈烈的受氣趇著𪜶。
25 願𪜶徛起的所在拋荒；
願𪜶的布棚無人住。
26 因為𪜶窘迫許個互你拍的人；
𪜶加添你拍傷的人的痛苦。
27 願你給𪜶罪上加罪；
毋通互𪜶無受定罪。
28 願你給𪜶的名對活命冊擦消，
毋通列佇義人的名單。
29 總是我困苦憂傷；
上帝啊，因為你的救恩求你給我安置佇高的所在。
30 我欲用詩歌稱讚上帝的名，
嘛欲用感謝尊伊做大。
31 按呢做會互上主歡喜，
比獻牛，獻有角有蹄的牛閣較好。
32 困苦的人看見會歡喜；
尋求上帝的人的心會活起來。
33 因為上主聽散赤人的祈求，
無看輕為著伊受關監的人。
34 願天及地稱讚伊，
海及彼內面一切的動物攏稱讚伊。
35 因為上帝欲救錫安，重建猶大的城；
𪜶會得著應允的地做產業，佇遐徛起。
36 伊的僕人的後代會承受彼個地；
疼伊的人會佇遐住落去。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。