上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
48
雅各祝福以法蓮及瑪拿西
諸個代誌了後，有人給約瑟講：「你的老父啲破病。」約瑟就導伊兩個子瑪拿西、以法蓮做夥去探雅各。
2 有人通知雅各講：「你的子約瑟來欲看你。」雅各勉強起來坐佇眠床。
3 雅各給約瑟講：「全能的上帝曾佇迦南地的路斯對我顯現，賜福我，
4 閣給我講：『我欲互你生湠真多，成做真多族；閣欲將此個地賞賜你的後代，做𪜶永遠的產業。』
5 「我猶未來埃及你遮以前，你佇埃及生的兩個子，以法蓮及瑪拿西，對現在起欲算做是我的子，親像呂便、西緬是我的子。
6 你以後生的子就是你的，𪜶通承接以法蓮及瑪拿西的產業。
7 我對美索不達米亞倒轉來迦南地的時，佇離開以法他猶有一站路的路中，你的老母蕾潔死，我非常傷心，給伊埋葬佇欲去以法他的路邊。」(以法他就是伯利恆。)
8 雅各看著約瑟兩個子，就講：「𪜶是什麼人？」
9 約瑟對伊的老父講：「𪜶是我的子，是上帝佇遮賞賜我的。」
雅各講：「請給𪜶導來我遮，我欲給𪜶祝福。」
10 雅各年老，目睭花，看𣍐清楚；約瑟導彼兩個子倚近雅各，雅各就給𪜶唚，給𪜶攬啲。
11 雅各給約瑟講：「我想𣍐到會當閣看著你；現在上帝閣互我看著你的子。」
12 約瑟將兩個子對雅各腳頭窩的中間導出來，然後仆佇土腳拜伊。
13 後來約瑟閣牽彼兩個子倚近雅各；正手牽以法蓮去伊的倒旁，倒手牽瑪拿西去伊的正旁。
14 雅各雙手拍叉，伸正手按細漢子以法蓮的頭殼，倒手按大子瑪拿西的頭殼。
15 伊就給約瑟祝福講：
「願我的祖先亞伯拉罕及以撒服事的上帝，
就是眷顧我一生直到今仔日的上帝，
16 願救贖我脫離所有的災難彼位天使，賜福互此兩個囝仔。
願我的名，以及我的祖先亞伯拉罕及以撒的名
通過𪜶流傳佇世間；
願𪜶佇地上生湠真多。」
17 約瑟看著伊的老父用正手按以法蓮的頭殼，就無歡喜。伊將老父的正手挺起來，欲對以法蓮徙到瑪拿西的頭殼。
18 約瑟對伊的老父講：「阿爸，毋是按呢啦！此個才是大子，請給你的正手按佇伊的頭殼。」
19 伊的老父毋肯，講：「我知，我的子，我知。瑪拿西嘛欲成做一族，閣強盛；毋拘伊的小弟以法蓮將來會比伊較強，成做大族。」
20 彼日，雅各給𪜶祝福講：「以色列人欲用恁給人祝福，講：『願上帝互你親像以法蓮及瑪拿西仝款。』」雅各給以法蓮排佇瑪拿西的頭前。
21 雅各閣給約瑟講：「我閣食無偌久啦。毋拘上帝會及恁同在，會導恁倒去恁列祖的地。
22 我以前用弓用刀，對亞摩利人搶來的示劍彼塊地，我欲互你，互你得著的比你的兄弟較多。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。