上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
37 大闢的詩。
義人及罪人的結局
毋通因為做歹的人心內不平；
毋通怨妒行為不義的人；
2 因為𪜶親像草真緊就焦去，
親像青翠的花草凋去。
3 著倚靠上主來做好，
𫢶佇此個土地安居樂業。
4 著因為上主來歡喜；
伊會滿足你的心願。
5 著將你的路途交託上主，
倚靠伊，伊會給你成全。
6 伊會互你的義親像光發出；
你的正直親像中晝的日頭。
7 著靜靜佇上主面前吞忍聽候；
毋通因為歹人的計謀成功來不平。
8 毋通受氣，著棄拺大受氣；
毋通不平，才免致到做歹。
9 因為做歹的人會受剿滅；
聽候上主的人會承受所應允的土地。
10 歹人真緊就會無去；
你詳細查伊的所在，嘛尋𣍐著。
11 毋拘謙卑的人會承受所應允的土地，
享受繁榮和平。
12 歹人設計欲害義人，
痛恨伊，對伊咬牙切齒。
13 主會給伊恥笑，
因為知伊受報應的日子啲欲到。
14 歹人拔刀開弓，
欲打倒困苦散赤的人，
刣死行為正直的人。
15 𪜶的刀會鑿入去家己的心；
𪜶的弓會受遏斷。
16 義人所有的雖然真少，
嘛比歹人有真多財富較好。
17 歹人的手骨會受遏斷，
毋拘上主扶持義人。
18 上主眷顧完全的人的年日；
𪜶的產業會當永遠保存。
19 𪜶佇患難的時𣍐致到見笑，
佇飢荒的日會得著飽足。
20 總是歹人會滅亡。
上主的對敵會假若野花謝去，
親像火燻消散。
21 歹人給人借，毋還；
義人慷慨施捨。
22 上主賜福的人會承受所應允的土地；
受伊咒詛的人會滅亡。
23 上主互義人的腳步穩固；
伊歡喜𪜶的所行所做。
24 𪜶著觸嘛𣍐跋倒，
因為上主用手扶𪜶。
25 我前少年今年老，
毋曾看著義人受放拺，
伊的後代做乞食。
26 伊不時慷慨施捨，歡喜借人；
伊的子孫得著祝福。
27 著拒絕歹，做好事，
就會永遠安然徛起。
28 上主意愛公平，
𣍐放拺伊聖的子民。
𪜶永遠受保護；
毋拘歹人的子孫會受剿滅。
29 義人會承受所應允的土地，
永遠𫢶佇遐。
30 義人的嘴講智慧；
伊的舌談論公平。
31 上帝的律法佇伊心內；
伊的腳攏𣍐踏脫。
32 歹人金金啲相義人，
數想欲刣伊。
33 上主𣍐放伊落佇歹人的手，
審判的時伊𣍐受定罪。
34 著聽候上主，遵守伊的道路，
伊就高升你，互你承受所應允的土地；
你會看著歹人消滅。
35 我看見強暴的歹人興旺，
親像樹佇家己的土地茂盛。
36 有人對遐經過，看咧，伊無去啦；
我尋嘛尋攏無。
37 詳細看完全正直的人，
因為愛和平的人有好的將來。
38 毋拘犯法的人會做一下滅亡；
歹人最後會受剿滅。
39 總是義人對上主得著拯救；
患難的時，伊做𪜶的避難所。
40 上主幫贊𪜶，拯救𪜶；
伊救𪜶，解放𪜶脫離歹人，
因為𪜶倚靠伊得著保護。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。