上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
45
約瑟表白伊的身份
約瑟忍𣍐牢，對許個佇伊身邊服事的人喝講：「恁攏出去！」約瑟對伊的兄弟表白身份的時，無別人在場。
2 伊出聲大哭；埃及人聽見，消息嘛傳到埃及王的王宮。
3 約瑟給伊的兄弟講：「我是約瑟！我的老父猶勇勇無？」伊的兄弟攏驚甲愣去，毋知欲按怎應伊。
4 約瑟閣給伊的兄弟講：「較倚來我遮咧。」𪜶就倚去。伊講：「我是恁的小弟，互恁賣來埃及的約瑟。
5 恁毋免因為賣我來遮心艱苦，自責；這是上帝派我代先恁來，通保全大家的性命。
6 今，飢荒已經兩年，猶有五年𣍐當種作，無通收成。
7 上帝派我代先恁來，是欲留恁的後代佇世間；閣欲解救恁，保全恁的性命。
8 按呢看起來，派我來遮的，毋是恁，是上帝；伊閣互我成做埃及王的首席顧問，做埃及的宰相，管理全國。
9 「恁著趕緊去給老父講：『你的子約瑟按呢講：上帝互我做埃及的宰相，請落來我遮，毋通延遲。
10 你及你的子、你的孫，及牛群羊群，以及一切所有的，攏通來住佇離我無偌遠的歌珊地區。
11 我欲佇遐奉待你；因為猶有五年的飢荒，才免你及全家，以及一切所有的歹過日。』」
12 約瑟閣講：「今，恁及小弟便雅憫攏有親目看著我，閣及我講話。
13 恁著將我佇埃及一切的榮光，及恁所看著的事，攏給老父講；閣著趕緊接老父來我遮。」
14 講煞，約瑟仆佇伊的小弟的頷頸啼哭，便雅憫嘛仆佇約瑟的頷頸啼哭。
15 約瑟閣及許個兄哥相唚，攬啲哮；後來伊的兄弟就及伊講話。
16 此個風聲傳到埃及王的宮內，講：「約瑟的兄弟來啦。」埃及王及伊的人臣攏真歡喜。
17 埃及王給約瑟講：「你著給你的兄弟講：『恁著將物件互牲生載，出發倒去迦南地，
18 將恁的老父及恁的家眷攏接來我遮；我欲將埃及地上好的物件互恁，恁嘛通食此所在的山珍海味。』
19 今我命令你，著對埃及地派車去，將𪜶的某、𪜶的囝仔，及恁老父攏接來。
20 叫𪜶毋通珍惜厝內的物件，因為埃及全地的好物，𪜶攏通享受。」
21 雅各的子兒就照按呢去做。約瑟照埃及王的吩咐，互𪜶車及路中需要的食物；
22 閣互𪜶逐個人一套衣服；毋拘互便雅憫三百塊銀，衣服五套。
23 約瑟送互𪜶老父的禮物有公的驢仔十隻，載埃及的好物；母的驢仔十隻，載五穀、餅，及食物，互老父路裡通用。
24 約瑟送𪜶兄弟倒去，閣給𪜶講：「恁佇路裡毋通冤家。」
25 𪜶對埃及倒去到迦南地𪜶老父雅各遐。
26 𪜶對雅各講：「約瑟猶活啲，閣作宰相，治理埃及全地。」雅各攏無反應，毋信𪜶的話。
27 𪜶就將約瑟給𪜶講的話，攏對𪜶老父雅各講；雅各看著約瑟派來欲載伊的車，心就活起來。
28 雅各講：「有夠好！我的子約瑟猶活啲，趁我猶未死，我欲去看伊。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。