上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
43
導便雅憫去埃及
迦南地區的飢荒真嚴重。
2 雅各許個子對埃及帶轉來的五穀已經食了，𪜶老父給𪜶講：「恁閣去給咱買一寡米糧。」
3 猶大對伊的老父講：「彼個人嚴嚴給阮警告，講：『恁若無導恁小弟來，就免想欲見我。』
4 你若互阮小弟做夥去，阮就落去給你買米糧。
5 你若毋互伊及阮做夥去，阮就無欲落去；因為彼個人給阮講：『恁若無導恁小弟來，就免想欲見我。』」
6 雅各講：「恁是按怎按呢害我，給彼個人講恁猶有小弟？」
7 𪜶應講：「彼個人一直給阮問阮及親族的代誌，講：『恁老父猶活啲無？恁猶有兄弟無？』阮攏照實講，阮哪會知伊會講『著導恁小弟來』。」
8 猶大閣給伊的老父雅各講：「你將此個囝仔交互我，阮就隨時出發，通互咱一家大細攏活落去，免枵死。
9 我給伊擔保，你通對我討人；我若無導伊倒來交互你，我願一生擔此個罪。
10 咱若無按呢延遲，阮已經第二遍倒來啦。」
11 𪜶老父雅各給𪜶講：「若是按呢，恁著帶咱遮上好的土產：一寡乳香及芳蜜，以及香料、沒藥、開心果、杏仁，做禮物，送互彼個人。
12 恁閣著帶重倍的銀，將恁佇布袋口發見的銀帶轉去還伊；彼個可能是失錯。
13 恁通導恁小弟出發，去見彼個人。
14 願全能的上帝互恁得著彼個人憐憫，互恁彼個兄弟及便雅憫會當倒來；我若失落我的子，我嘛著接受。」
15 𪜶就帶許個禮物及重倍的銀，閣導便雅憫出發落去埃及，徛佇約瑟的面前。
16 約瑟看著便雅憫及𪜶做夥來，就對管家講：「導諸個人去厝內，閣刣牲生，準備宴席；中晝，諸個人欲及我做夥食飯。」
17 管家就照約瑟的吩咐去做，導𪜶入去約瑟的厝內。
18 許個人互管家導入去約瑟的厝，就真驚惶，講：「導咱來遮，一定是因為頭一遍佇布袋口還咱銀，欲尋咱的孔縫，下手害咱，強迫咱做奴隸，搶咱的驢。」
19 𪜶就行倚約瑟的管家，佇門口對伊
20 講：「先生，阮頂遍落來，真正是欲買糧食；
21 後來到歇暝的所在，開阮的袋仔，無拍算，阮逐個人的銀原封不動佇逐個人的布袋口；今阮有閣帶來欲還恁。阮另外有閣帶銀欲來買米糧。
22 阮毋知什麼人將阮的銀下佇阮的布袋內。」
23 彼個管家講：「做恁安心，免驚；是恁的上帝，嘛是恁老父的上帝，將財寶囥佇恁的布袋內；恁的銀我已經收著。」然後伊就導西緬出來交互𪜶。
24 管家導許個人入去約瑟的厝，捧水互𪜶洗腳，閣提草料飼𪜶的驢仔。
25 𪜶就準備許個禮物，聽候約瑟中晝倒來；因為𪜶聽著𪜶欲佇遐食飯。
26 約瑟倒來到厝，𪜶就將帶入去厝內的禮物提出來送伊，閣仆佇土腳拜伊。
27 約瑟給𪜶請安，閣問𪜶，講：「恁所講彼個年老的老父有平安無？伊有好勢好勢無？」
28 𪜶應講：「你的僕人阮老父有平安，猶活啲。」𪜶就俯頭拜伊。
29 約瑟攑頭看伊仝老母的小弟便雅憫，就講：「恁給我講的煞尾小弟是此個是無？」閣講：「少年人，願上帝施恩互你。」
30 約瑟疼小弟的情大激動，趕緊欲尋一個所在哮，就入去伊的房間啼哭。
31 後來伊洗面了出來，勉強忍啲，吩咐開桌。
32 𪜶為著約瑟另外排一塊桌，為伊的兄弟閣排一塊，嘛為許個及約瑟做夥食的埃及人另外排一塊；因為埃及人看及希伯來人做夥食飯做禁忌。
33 約瑟的兄弟坐佇伊的對面，𪜶的坐位照大細的次序安排；𪜶攏真卬愕，互相看來看去。
34 約瑟將伊面前的食物分互𪜶，毋拘便雅憫得著的比別人五倍多；𪜶及約瑟做夥飲酒宴樂。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。