上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以斯帖記
3
哈曼計謀消滅猶太人
諸個代誌以後，亞哈隨魯王提拔亞甲族哈米大他的子哈曼，互伊的官位比所有的人臣較高。
2 所有佇王宮執行任務的官員，攏照王的命令給哈曼跪拜；毋拘末底改毋跪毋拜。
3 佇王宮執行任務的官員問末底改講：「你是按怎無欲服從王的命令？」
4 𪜶逐日給伊苦勸，伊攏毋聽；因為伊曾給𪜶講，伊是猶太人，所以無欲給哈曼跪拜。𪜶就給哈曼講，欲看末底改會當堅持偌久。
5 哈曼看著末底改毋對伊跪拜；就滿腹受氣。
6 𪜶已經給哈曼講末底改是猶太人；哈曼想講干焦刣末底改一個人無夠額，就計謀欲消滅亞哈隨魯王全國的猶太人，就是末底改的同胞。
7 亞哈隨魯王第十二年正月，就是尼散月，哈曼命令人抽普珥，就是抽籤，決定欲害猶太人的日期，抽著十二月，就是亞達月。
8 哈曼對亞哈隨魯王講：「佇你統治的王國有一個民族，分散佇逐省人民的中間徛起；𪜶的律例及其他民族無仝款，嘛無遵守王的法令；所以若容允𪜶，對王無利益。
9 王若看做妥當，請下令給𪜶消滅；我願意捐銀三十四萬公斤，交互負責財政的人收入王的府庫。」
10 王就剝伊的手指互猶太人的對敵，亞甲族哈米大他的子哈曼。
11 王給哈曼講：「諸個銀賜互你，彼個民族嘛交互你，照你的意思辦𪜶！」
12 正月十三，王的書記奉命，照哈曼的指示，用逐省的文字、逐民族的語言，行文互王的人臣、逐省的省長，及逐族的領袖。此個詔書用亞哈隨魯王的名義，蓋王的手指印頒布。
13 送文書的將詔書送到全國逐省，命令將猶太人，對少年到老、嬰仔、婦仁人，佇十二月，就是亞達月十三日，一日內給𪜶刣死，完全剿滅，閣搶𪜶的財產。
14 詔書的抄本送互逐省，對全國人民宣布，互𪜶準備，聽候彼日。
15 送文書的照王的命令，真緊就出發。詔書佇書珊城公佈，全城攏起混亂。彼時，王及哈曼坐啲飲酒。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。