上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
尼希米記
6
陷害尼希米的陰謀
參巴拉、多比雅、阿拉伯人基善，及阮其他的對敵聽著我已經完成城牆的重建，所有的破隙攏修補好勢；毋拘城門猶未安門扇。
2 參巴拉及基善就派人來給我講：「請你來，咱佇阿挪平原一個庄社見面。」其實𪜶是想欲害我。
3 我就派使者去給𪜶講：「我此陣啲進行大的工程，𣍐當去；我哪通離開遮去見恁，互此個工程受阻擋？」
4 𪜶按呢四遍派人來見我，我攏用仝款的話回答𪜶。
5 參巴拉第五遍派伊的部下來見我，手提無封起來的批；
6 批內按呢寫：「佇列國中有風聲，基善嘛證實講，你及猶太人想欲造反，所以你才啲修建城牆；根據諸個話，你想欲做𪜶的王。
7 你閣佇耶路撒冷指派先知為著你宣傳講：『佇猶大有王。』諸個話一定會傳到王遐；所以請你來，咱做夥參詳。」
8 我就差人去給伊講：「你講的代誌無影無跡，是你家己捏造的。」
9 𪜶想欲恐嚇阮，互阮的手無力通完成此個工程。我祈禱講：「上帝啊，求你互我堅強。」
10 有一日，我去示瑪雅的厝欲見伊，伊是米希大別的孫，第來雅的子；彼時伊家己關佇厝內。伊對我講：「咱來去上帝的厝，入去殿內，將聖殿的門關起來；因為𪜶欲來害你，欲佇暝時刣你。」
11 我講：「我豈是彼款會逃閃的人？我豈通匿𫢶聖殿內保全家己的性命？我毋入去。」
12 彼時我才知，上帝並無差伊，是多比雅及參巴拉給伊買收，講預言攻擊我。
13 𪜶買收伊的目的，是欲給我嚇驚，互我照𪜶的話去做來犯罪，留歹名聲互人恥笑。
14 我的上帝啊，求你毋通𣍐記得多比雅、參巴拉、女先知挪亞底，及其他許個先知所做給我嚇驚的代誌，毋通放𪜶煞。
重建工程結束
15 經過五十二日的工作，佇以祿月二十五日，城牆的重建就完成。
16 阮四圍列國許個對敵聽著就攏著驚，感覺漏氣見笑；因為𪜶攏知此個工程會當完成，是出佇上帝的幫贊。
17 佇彼段期間，猶大的貴族常常寫批互多比雅，多比雅嘛給𪜶回批。
18 佇猶大有真多人及多比雅結盟，因為伊是亞拉的子示迦尼的子婿；閣多比雅的子約哈難娶比利加的子米書蘭的查某子做某。
19 𪜶常常佇我的面前講多比雅的好話，嘛將我的話傳互伊。多比雅閣常常寫批給我恐嚇。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。