上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
尼希米記
2
尼希米轉去耶路撒冷
亞達薛西王第二十年尼散月，有酒排佇王的面前，我就奉酒互伊。我平常時佇伊的面前毋曾有憂悶的面色。
2 伊問我講：「你無破病，面色哪即歹看？你一定心情無好。」我就真驚。
3 我對王講：「願皇上萬歲！我的面色會即呢歹看，是因為安葬阮祖先的城拋荒，城門攏互火燒去。」
4 伊問我講：「你愛欲求什麼？」
對按呢，我對天頂的上帝祈禱。
5 我就對王講：「皇上若看做好，你的僕人若對你得著恩典，求你差我去猶大，去安葬阮列祖的城，互我通重建彼個城。」
6 彼時王后坐佇王的邊仔。王給我講：「你欲去偌久？什麼時會倒來？」伊歡喜差我去，我就及伊約定一個期限。
7 我閣對伊講：「皇上若看做好，請發詔書互我帶去交互河西省許個省長，准我過境去猶大；
8 閣發一封詔書互管理皇家樹林的亞薩，教伊互我柴料，通做修建聖殿邊堡壘的門、城牆，及我所欲住的厝的路用。」伊允准我的請求，因為我的上帝施恩的手幫贊我。
9 王派幾若個軍官及馬兵護送我去。我到河西省許個省長遐，將詔書交互𪜶。
10 和崙人參巴拉，及官員亞捫人多比雅聽見有人來欲為以色列人爭取權益，就真無歡喜。
11 我到耶路撒冷，佇遐三日。
12 後來，我半暝起來，有幾個人及我做夥出去。我的上帝感動我的心欲為耶路撒冷做的事，我攏無給人講；我騎的牲生以外，無帶別隻做夥去。
13 我透暝對山谷門出去，經過龍泉到糞埽門，觀察耶路撒冷的城牆，看著城牆受拆毀，城門互火燒去。
14 我閣去到泉門及王池；毋拘遐無所在互我騎的牲生過去。
15 我就透暝沿溪上去，觀察城牆，然後照原路，經過山谷門倒來。
16 許個官長毋知我去叨位，做什麼代誌；我猶未給猶太的人民、祭司、貴族、官長，及其他欲參與此個工作的人講。
17 後來我給𪜶講：「咱所抵著的災難，耶路撒冷按怎拋荒，城門互火燒去，恁攏有看著。來！咱來重建耶路撒冷的城牆，才免咱閣受凌辱。」
18 我閣給𪜶講我的上帝的手按怎幫贊我，及王對我講什麼話。
𪜶就講：「咱起來重建！」對按呢，𪜶堅強起來，做此個好的工程。
19 毋拘，和崙人參巴拉及官員亞捫人多比雅，以及阿拉伯人基善聽見，就恥笑阮，看輕阮，講：「恁是啲做什麼？是欲背叛王是無？」
20 我應𪜶講：「天頂的上帝會互阮成功。阮是伊的僕人，欲起來重建；恁佇耶路撒冷無分，無權，無人會給恁記念。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。