上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以斯拉記
6
發見塞魯士王的詔書
大流士王就降旨，去巴比倫的府庫調閱皇家記錄。
2 佇米底亞省亞馬他城的宮內，尋著一卷古卷，內面按呢記載：
3 塞魯士王元年，王為耶路撒冷上帝的聖殿降旨：著重建此間殿做獻祭的所在，下堅固的地基，殿高二十七公尺，闊嘛二十七公尺；
4 用大石三層，木材一層；經費由王家支付。
5 以前尼布甲尼撒對耶路撒冷上帝的聖殿搶去，下佇巴比倫許個金銀的器具，著帶轉去耶路撒冷，照原位下佇上帝的聖殿。
大流士王下令繼續起聖殿
6 對按呢，大流士王下令：
河西省總督達乃，及示他‧波斯乃，以及河西省的官員，恁毋通干涉𪜶，
7 毋通阻擋上帝聖殿的工程，著互猶大省長及長老繼續佇原位重建上帝的聖殿。
8 我命令恁著幫贊猶大的長老重建上帝的聖殿；對王的府庫，河西省的稅收中撥充足的經費互許個人，才免工事停止。
9 𪜶向天頂的上帝獻燒化祭所需要的牛仔、綿羊、羊羔，以及小麥、鹽、酒、油，攏著照耶路撒冷的祭司所講的，逐日供給互𪜶，毋通失誤；
10 通互𪜶獻芳芳的祭物互天頂的上帝；閣為著王及王的子兒孫長歲壽祈禱。
11 我閣降旨，若有人改變此個命令，就欲對伊的厝拆一支樑，將伊釘佇彼頂面，掛起來，互伊的厝為著按呢變做糞埽堆。
12 若有君王及人民改變此個命令，毀壞此間上帝的聖殿，願揀選耶路撒冷互人來敬拜伊的彼位上帝消滅𪜶。我大流士出此個命令，著確實遵行。
奉獻聖殿
13 對按呢，河西省總督達乃，及示他‧波斯乃，以及𪜶的同事，就確實遵行大流士王的命令。
14 猶大的長老因為先知哈該及易多的孫撒迦利亞所傳達上帝的話，就著手重建，工程進行順利。𪜶遵趁以色列上帝的命令，及波斯皇帝塞魯士、大流士，及亞達薛西的命令，完成重建。
15 大流士王坐位第六年，亞達月初三，此間聖殿完工。
16 以色列人、祭司及利未人，以及其他流亡倒來的人，攏歡歡喜喜舉行奉獻上帝聖殿的慶典。
17 為著奉獻上帝的聖殿，𪜶獻牛一百隻、綿羊兩百隻、羊羔四百隻。𪜶閣照以色列支族的數目，獻山羊十二隻做以色列眾人的贖罪祭。
18 𪜶照摩西的冊的記載，派祭司照𪜶的組別，利未人照𪜶的班次，佇耶路撒冷服事上帝。
守𨃟過節
19 正月十四，流亡倒來的人守𨃟過節。
20 祭司及利未人攏潔淨家己；逐個人佇禮儀上攏清氣，就為著流亡倒來的人，及𪜶的親族眾祭司，嘛為著家己刣𨃟過節的羊羔。
21 流亡倒來的以色列人，以及離開異教歸倚以色列人，敬拜上主 — 以色列的上帝許個人，攏食𨃟過節的羊羔。
22 𪜶歡歡喜喜守除酵節七日；𪜶即呢歡喜，是因為上主互亞述王的心對𪜶友善，支持𪜶重建以色列上帝的聖殿。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。