上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
30
準備守𨃟過節
希西家派人去以色列及猶大逐所在，閣寫批互以法蓮及瑪拿西的人，邀請𪜶來耶路撒冷上主的聖殿守𨃟過節，服事上主 — 以色列的上帝。
2 因為王及伊的官員，及佇耶路撒冷的會眾，已經參詳好，欲佇二月守𨃟過節。
3 正月𪜶𣍐當守節，因為潔淨家己的祭司的人數猶無夠額，人民嘛猶未聚集佇耶路撒冷。
4 王及會眾攏贊成此個計劃，
5 就佇以色列全地，對別是巴到但宣告，請人民攏來耶路撒冷守𨃟過節，服事上主 — 以色列的上帝；因為過去照所寫的律法來守節的人無赫呢多。
6 送批的人帶王及伊許個官員的批，去以色列及猶大全地，宣讀王的命令，講：
「以色列人，著歸向上主 — 亞伯拉罕、以撒、雅各的上帝，伊就欲轉向恁，就是恁諸個脫離亞述諸王的手所賰的人民。
7 恁毋通親像恁的列祖及恁的同胞。照恁所知，𪜶得罪上主 — 𪜶列祖的上帝，致到伊給𪜶消滅。
8 今毋通親像恁的列祖硬心固執；著歸順上主，進入伊永遠分別作聖的聖殿，閣著服事上主 — 恁的上帝，互伊無閣對恁發大受氣。
9 恁若歸向上主，恁的同胞及恁的兒女會對掠𪜶的人得著憐憫，閣倒來此個所在，因為上主 — 恁的上帝是慈悲憐憫。恁若歸向伊，伊一定會接納恁。」
10 送批的人一城過一城，行透以法蓮、瑪拿西，直到西布倫諸個地區，毋拘許個人給𪜶恥笑，侮辱。
11 亞設、瑪拿西、西布倫中間有一寡人家己謙卑，來到耶路撒冷。
12 上帝嘛感動猶大人，互𪜶同心一意順趁上主的話，照王及許個領袖的命令去做。
守𨃟過節
13 二月，有真多人聚集佇耶路撒冷，成做真大的大會，欲守除酵節。
14 𪜶將耶路撒冷獻祭燒香的壇攏徙走，㧒佇汲淪溪谷。
15 二月十四，𪜶刣𨃟過節的羊羔。祭司及利未人感覺見笑自責，就潔淨家己，閣帶燒化祭來上主的殿。
16 𪜶照上帝重用的人摩西的律法的規定，逐個人徛佇𪜶侍奉的所在；祭司將對利未人接過來的血灑佇祭壇頂。
17 會中有真多人禮儀上無清氣，所以託利未人替𪜶刣𨃟過節的羊羔，互𪜶佇上主的面前成做清氣。
18 對以法蓮、瑪拿西、以薩迦、西布倫地區來的人，有真多無照規定潔淨家己，嘛食𨃟過節的祭物。希西家替𪜶祈禱，講：「懇求至善的上主赦免
19 所有無照規定潔淨家己的人，因為𪜶專心尋求上帝，就是上主 — 𪜶列祖的上帝。」
20 上主聽希西家的祈禱，就赦免人民。
21 住佇耶路撒冷的以色列人非常歡喜，守除酵節七日久；利未人及祭司逐日用響亮的樂器稱讚上主。
22 希西家鼓勵所有𠢕服事上主的利未人。眾人食宴席七日，獻平安祭，閣感謝上主 — 𪜶列祖的上帝。
繼續守節
23 大會全體會眾決定欲閣守節七日。𪜶就歡歡喜喜閣慶祝七日。
24 猶大王希西家送大會牛一千隻、羊七千隻；眾領袖嘛送牛一千隻、羊一萬隻；閣有真多祭司潔淨家己。
25 猶大會眾、祭司、利未人，及對以色列來的會眾，以及許個對以色列地來的外族人，及住佇猶大的外族人，攏歡喜快樂。
26 按呢，耶路撒冷充滿歡喜快樂，因為對以色列王大闢的子所羅門以後，佇耶路撒冷毋曾即呢歡喜。
27 祭司及利未人起來給人民祝福；𪜶的聲上帝有聽見，𪜶的祈禱透到伊天裡的聖所。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。