上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
39
約瑟及波提乏的某
約瑟互人帶落去埃及；有一個埃及人，就是法老的人臣侍衛長波提乏，對許個以實瑪利人將約瑟買去。
2 上主及約瑟同在，互伊事事順利；伊住佇主人埃及人波提乏𪜶兜。
3 伊的主人看見上主及約瑟同在，閣上主互約瑟所做的事攏順利，
4 就合意約瑟，互約瑟佇身軀邊服事。主人派約瑟管理伊的家，將所有的攏授權互伊。
5 對彼時開始，上主因為約瑟的緣故，賜福互彼個埃及人的家；上主祝福彼個埃及人的家庭及田園所有的。
6 彼個埃及人將伊一切所有的攏授權互約瑟；伊所食的物以外，伊攏無啲管。
約瑟生做緣投體格好。
7 諸個代誌以後，約瑟的女主人給伊使目尾，對伊講：「來及我睏。」
8 約瑟毋肯，對伊的女主人講：「你知，主人已經將伊所有的交代我；有我佇遮，主人就攏毋免操煩。
9 佇此個家，無人比我較大；你以外，伊無一項無交互我，因為你是伊的某。按呢，我哪通做此款極歹的事得罪上帝？」
10 女主人雖然逐日按呢給約瑟引誘，毋拘約瑟毋肯聽伊的話，攏無及伊做夥睏，嘛無欲及伊做夥。
11 有一日，約瑟入去厝內辦代誌；厝內攏無人。
12 女主人扭伊的衫，講：「你來及我睏。」約瑟將衫放佇伊的手，走出去外面。
13 女主人看著約瑟將衫放互伊，閣走出去外面，
14 就叫家內的人來，給𪜶講：「恁看咧，主人給一個希伯來人導入來咱厝內戲弄咱；伊來我遮，欲及我睏，我就大聲喝。
15 伊聽著我出聲喝，就將伊的衫放佇我遮，走出去外面。」
16 婦仁人將約瑟的衫收佇伊遐，聽候約瑟的主人倒來。
17 伊對伊的丈夫講諸個代誌，講：「你帶來咱遮彼個希伯來奴隸入來我遮，欲戲弄我；
18 我一下大聲喝，伊就將伊的衫放佇我遮，走出去外面。」
19 約瑟的主人聽著伊的某對伊講「你的奴隸按呢按呢對待我」，就非常受氣。
20 約瑟的主人將伊關佇啲關王的犯人的監獄。對按呢，約瑟就佇遐坐監。
21 毋拘上主及約瑟同在，施恩互伊，互監獄長合意伊。
22 監獄長就將監獄內面的犯人攏交互約瑟管理；監獄內面所有的代誌，攏是伊啲處理。
23 所有交互約瑟辦理的代誌，監獄長完全信任，因為上主及約瑟同在，互伊事事順利。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。