上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
23
推翻亞她利雅
( 王下 11:4-16 )
第七年，耶何耶大勇敢採取行動；召集導一百個兵的軍官耶羅罕的子亞撒利雅、約哈難的子以實瑪利、俄備得的子亞撒利雅、亞大雅的子瑪西雅、細基利的子以利沙法，來及伊立約。
2 𪜶行透猶大，對猶大許個城聚集利未人及以色列逐宗族的族長來耶路撒冷。
3 所有的會眾佇上帝的殿及王立約。耶何耶大對𪜶講：「恁看，王的子佇遮！照上主對大闢後代的應允，伊一定著作王。
4 今，恁著按呢做：恁諸個祭司及利未人，佇安歇日值班的時，著三分一顧守聖殿所有的門，
5 三分一顧守王宮，三分一顧守根基門；會眾攏著佇上主聖殿的埕。
6 所有的人民攏毋通進入上主的殿；只有祭司及啲服事的利未人通入去，因為𪜶有聖化歸上主。所有的人民著遵守上主的命令。
7 利未人著帶軍器，佇王的四圍保護；所有進入聖殿的人著互伊死；王無論佇叨位，恁攏著跟隨保護伊。」
8 利未人及猶大眾人，攏照祭司耶何耶大的命令去做；逐個人帶𪜶的部下，無論安歇日值班抑是無值班的人攏來；因為祭司耶何耶大毋准𪜶離開。
9 祭司耶何耶大就將囥佇上帝聖殿內面大闢王的槍及大細盾牌，交互許個管一百個兵的軍官。
10 耶何耶大閣將軍器分互人民；𪜶佇祭壇及聖殿遐，對殿的南旁到北旁，徛佇王的四圍保護。
11 𪜶就導約阿施出來，給伊戴王冠，將有關王權的約書交互伊；耶何耶大及伊許個子給伊抹油，設立伊作王；𪜶喝講：「願王萬歲！」
12 亞她利雅聽著人民那走那謳咾王的聲，就去到聚集佇上主聖殿的人民遐，
13 看著王徛佇聖殿入口的柱邊，官長及歕喇叭的人徛佇王的邊仔；國內的人民攏歡喜，歕喇叭；閣有唱歌的，用逐款的樂器導人民唱歌謳咾。亞她利雅就拆裂伊的衫，喝講：「造反啦，造反啦！」
14 祭司耶何耶大導許個管一百個兵的軍官出來，因為伊毋愛有人佇上主的聖殿互人刣死，就對𪜶講：「給伊對隊伍的中間趕出去；欲隨伊的，著互伊死。」
15 𪜶閃開雙旁互亞她利雅過去；伊到進入王宮的馬門，就佇遐互人刣死。
耶何耶大的改革
16 ( 王下 11:17-20 )
耶何耶大及王以及人民做夥立約，欲做上主的子民。
17 對按呢，全國的人民攏給巴力的廟拆毀，拍碎祭壇及偶像，閣佇壇前拍死巴力的祭司馬坦。
18 耶何耶大派利未人做祭司的負責顧守上主的聖殿。諸個祭司是照大闢以前的規定，啲負責上主聖殿的職務；照摩西的律法，歡喜稱讚，向上主獻燒化祭。
19 伊嘛派人顧守上主聖殿逐個門；無論什麼緣故，禮儀上無清氣的人攏𣍐用得入去。
20 耶何耶大閣導軍官及貴族，民間的首領及全國人民，請王對上主的聖殿落來；對正門進入王宮，互伊坐王位。
21 全國人民攏歡喜快樂，全城攏平靜；亞她利雅已經互人刣死。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。