上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
1
所羅門求智慧
( 王上 3:1-15 )
大闢的子所羅門堅固伊對以色列的統治，上主 — 伊的上帝及伊同在，互伊受尊做大。
2 所羅門召集以色列眾人，就是管一千人及管一百人的軍官、審判官，以及全以色列的領袖及族長，
3 導𪜶去基遍的山頭壇；佇遐有上帝的會幕，是上主的僕人摩西佇曠野所造的。
4 彼時大闢已經將上帝的約櫃對基列‧耶琳徙來耶路撒冷，囥佇伊為著約櫃搭的布棚。
5 毋拘戶珥的孫，烏利的子比撒列所造的銅壇猶佇基遍上主的會幕前；所羅門及會眾佇遐求問上主。
6 所羅門佇會幕前敬拜上主，佇銅壇獻一千隻牲生做燒化祭。
7 彼暝，上帝對所羅門顯現，給伊講：「你愛我賜你什麼，通對我求。」
8 所羅門對上帝講：「你曾施大恩互我的老父大闢，閣互我續接伊作王。
9 主上帝，今求你實現你對我的老父大闢的應允，因為你設立我做此個人民的王，𪜶親像地上的土沙赫多。
10 今求你賜我智慧聰明，互我通領導此個國家，治理諸個人民；若毋是按呢，啥人會當治理你即多的人民？」
11 上帝對所羅門講：「既然你的心意是按呢，無求錢財、富足、尊榮，及消滅對敵的性命，嘛無求長歲壽，只有求智慧聰明，通治理我的子民，就是你受設立作王治理的人民。
12 所以我欲賜你智慧聰明，嘛欲賜你錢財、富足、尊榮；超過你以前的列王，佇你以後嘛𣍐有人親像你按呢。」
所羅門的兵力及財力
13 ( 王上 10:26-29 )
所羅門對基遍山頭壇的會幕倒來耶路撒冷，作王治理以色列。
14 所羅門王有建立軍隊，戰車一千四百台，馬兵一萬兩千名；給𪜶安置佇許個囤戰車的城，及耶路撒冷王遐。
15 王統治期間，耶路撒冷的金銀親像石頭赫多，柏香柴親像山埔的桑材樹赫多。
16 所羅門的馬攏對埃及及科威進口，是王的生理人對科威照市價買來的。
17 對埃及進口的戰車，逐台大約七公斤的銀；戰馬逐隻大約兩公斤的銀。所羅門的生理人嘛經手，將諸個出口賣互赫人及敘利亞人許個王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。