上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
29
為起造聖殿奉獻禮物
大闢王對全會眾講：「我的子所羅門是上帝特別揀選的，毋拘猶少年，無經驗。此個工程真大，因為此個聖殿毋是為著人，是為著主上帝起的。
2 我為著我的上帝的殿已經盡力，有準備金、銀、銅、鐵、柴，欲做逐款器具；閣有準備真多紅瑪瑙、通鑲的寶石、光石、彩色的石、逐款的寶石，及大理石。
3 我意愛我的上帝的殿，就佇準備起聖殿的材料以外，閣將我積聚的金銀，攏獻做起我上帝聖殿的路用；
4 就是俄斐的金一百外公噸，純銀兩百四十外公噸，來貼聖殿的壁；
5 以及互師傅做金器、銀器，及所有器具的路用。今仔日猶有什麼人歡喜奉獻，奉獻伊本身互上主？」
6 按呢，族長、以色列逐支族的首領、管一千人及管一百人的軍官，以及監督許個給王作工的人的官長，攏甘心奉獻。
7 𪜶為著上帝聖殿的工程，奉獻金一百七十外公噸、銀三百四十外公噸、銅約六百二十公噸，及鐵三千四百公噸。
8 有寶石的人攏將寶石提去交互革順人耶歇，送入上主聖殿的府庫。
9 人民攏真歡喜奉獻，因為𪜶盡心獻互上主；大闢王嘛非常歡喜。
大闢稱讚上主
10 大闢佇全會眾的面前稱讚上主，講：「上主 — 阮祖先以色列的上帝應該受稱讚，對永遠到永遠。
11 上主，你至大，有權能、榮光、勝利、威嚴；天頂地下所有的攏是你的。上主，國是你的，你至高，是萬有的主宰。
12 富裕尊貴攏對你來，你嘛掌管萬有；你有大權能大氣力，互人偉大強盛。
13 阮的上帝，今阮感謝你，稱讚你榮耀的名。
14 「我算什麼，我的子民算什麼，阮竟然會當按呢甘心奉獻？萬物攏對你來，阮不過用你的物獻互你。
15 阮佇你的面前是出外人，是寄居的，及阮的祖先仝款。阮佇世間的日子親像影，無什麼向望。
16 上主 — 阮的上帝啊，阮準備諸個所有的材料，欲為著你的聖名起造聖殿，諸個攏是對你來，嘛攏是你的。
17 我的上帝，我知你監察人的心，意愛正直；我用正直的心甘心奉獻諸個所有的物。現在我真歡喜看著你的子民佇遮，攏甘心奉獻互你。
18 上主 — 阮列祖亞伯拉罕、以撒、雅各的上帝，求你互你的子民常常存此款心思意念，堅決歸向你。
19 閣求你賞賜我的子所羅門純全的心，徹底遵守你的誡命、教示、規例，閣用我準備的起造聖殿。」
20 大闢對全會眾講：「恁著稱讚上主 — 恁的上帝。」全體會眾就稱讚上主 — 𪜶列祖的上帝，俯頭跪拜上主及王。
21 隔日，𪜶向上主獻祭。𪜶獻燒化祭互上主，公的牛一千隻、公的綿羊一千隻、細隻羊仔一千隻，及奠酒祭；閣為以色列的人民獻真多祭物。
22 彼日，𪜶佇上主的面前飲食，非常歡喜。
𪜶第二遍設立大闢的子所羅門作王，佇上主面前給伊抹油作王；閣用油抹撒督做祭司。
23 所羅門就坐上主所賞賜的王位，續接伊的老父大闢作王。伊事事順利，以色列人民攏歸順伊。
24 所有的領袖及勇士，連大闢王攏總的子兒嘛攏順服所羅門王。
25 上主互所羅門佇以色列人民的面前受尊做大；互伊有國王的威嚴，超過以色列以前所有的王。
大闢死
26 耶西的子大闢做全以色列的王。
27 伊作王統治以色列共四十年：佇希伯崙七年，佇耶路撒冷三十三年。
28 伊享受榮華富貴，食長歲壽。伊的子所羅門續接伊作王。
29 大闢王一生的事蹟攏記載佇先見撒母耳、先知拿單，以及先見迦得的冊。
30 諸個冊嘛記載伊按怎治理國政及伊的成就，閣記載伊及以色列以及四圍國家所經歷的事。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。