上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
17
拿單互大闢的信息
( 撒下 7:1-17 )
大闢住佇王宮，伊對先知拿單講：「你看，我住佇柏香柴的宮殿，毋拘上主的約櫃𫢶佇布棚。」
2 拿單對大闢講：「你想欲按怎，就通去做，因為上帝及你同在。」
3 彼暝上帝的話臨到拿單，講：
4 「你去給大闢我的僕人講：『上主按呢講：你毋通起聖殿互我住。
5 對我導以色列人上來遮到現在，我毋曾住佇殿裡，攏是對此個布棚到彼個布棚，對此個會幕到彼個會幕。
6 我及以色列人同行的時，豈曾對叨一個牧養我的子民的士師講：恁哪無給我起柏香柴的殿？』
7 「今你著給我的僕人大闢講：『上主 — 萬軍的統帥按呢講：我對牧場揀召你，互你無閣飼羊，是欲互你做我的子民以色列的統治者。
8 你無論去叨位，我會及你同在，消滅你面前所有的對敵。我一定互你有名聲，親像世間的偉人赫呢出名。
9-10 我欲為著我的子民以色列準備一個所在，給𪜶安頓，互𪜶徛起佇家己的所在，無閣受攪擾，無閣親像早前我命令士師管理我的子民以色列的時代，受兇惡的人欺壓。我欲互你的對敵攏降服。我閣宣布，我上主欲建立你的王朝。
11 到你的歲壽滿，轉去你的祖先遐的時，我欲選立你的後代，你的一個子，來續接你，閣欲互伊的國穩固。
12 伊欲為著我起聖殿；我欲堅固伊的王位直到永遠。
13 我欲做伊的父，伊欲做我的子。我無欲互我的慈愛離開伊，親像我曾互慈愛離開你前彼個王。
14 我嘛欲互伊永遠治理我的子民及我的國；伊的王位會堅固到永遠。』」
15 拿單就照上帝啟示的話攏給大闢講。
大闢感恩的祈禱
16 ( 撒下 7:18-29 )
大闢王就入去會幕，坐佇上主的面前，講：「主上帝，我是啥人，我的家算什麼，你竟然導我到此個地位？
17 毋若按呢，上帝啊，你閣眷顧你奴僕的家的將來；主上帝啊，你款待我親像尊貴的人。
18 你真清楚你的奴僕，你互你的奴僕得著的尊貴，我大闢猶有什麼話通講？
19 上主啊，因為你的奴僕的緣故，閣照你的旨意，你有做諸個大事，閣互人知諸個偉大的所做。
20 上主啊，照阮所聽見，無一個會當及你比，你以外無上帝。
21 世間豈有一個國親像你的子民以色列？上帝你有救贖𪜶，互𪜶成做你的子民。你做極大閣通驚的事，互你家己得著榮耀，因為你有趕逐列邦離開你對埃及解救出來的子民。
22 你互你的人民以色列永遠做你家己的子民；上主啊，你閣做𪜶的上帝。
23 「上主，你對你的奴僕及伊的家的應允，願你照你所講的實現，互伊永遠穩固。
24 願你的名永遠堅固，受尊做大，講：『上主 — 萬軍的統帥以色列的上帝，真正是以色列的上帝！』閣你的奴僕大闢的家欲佇你的面前堅立。
25 我的上帝啊，因為你有啟示你的奴僕，你欲建立伊的王朝，所以你的奴僕好膽佇你的面前祈禱。
26 「上主，只有你是上帝！你用此個福氣應允你的奴僕。
27 今，你歡喜賜福你奴僕的家，互伊佇你的面前永遠穩固。上主，因為你已經賜福，你會永遠得著稱讚！」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。