上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
12
早期跟隨大闢的便雅憫人
大闢為著閃避基士的子掃羅，匿佇洗革拉的時，下面諸個勇士來到伊遐，幫贊伊交戰。
2 𪜶會用正手倒手射箭，挕石頭；攏是便雅憫人，是掃羅的親族：
3 導頭的是亞希以謝，閣落去是約阿施，𪜶攏是基比亞人示瑪的子；
閣有亞斯瑪威的子耶薛及比力、比拉迦
亞拿突人耶戶
4 基遍人伊施瑪雅 (三十人中的一個勇士，啲管理彼三十人)、耶利米、雅哈悉、約哈難
基底拉人約撒拔、
5 伊利烏賽、耶利摩、比亞利雅、示瑪利雅
哈律弗人示法提雅
6 可拉人以利加拿、伊示雅、亞薩列、約以謝、雅朔班
7 基多人耶羅罕的子猶拉及西巴第雅。
跟隨大闢的迦得人
8 迦得支族有幾若人來到曠野的要塞，歸順大闢。𪜶攏是勇猛的戰士，夯盾牌，攑槍，𠢕相刣；𪜶的面親像獅的面，𠢕走親像山裡的鹿。
9 頭一個以謝珥，第二俄巴底亞，第三以利押，
10 第四彌施瑪拿，第五耶利米，
11 第六亞太，第七以利業，
12 第八約哈難，第九以利薩巴，
13 第十耶利米，第十一末巴奈。
14 諸個攏是迦得支族的軍官；上細的一個抵一百，上強的一個抵一千。
15 正月約旦河的水漲滿雙旁岸的時，𪜶過河，互所有住佇平原的人驚甲四散逃走。
跟隨大闢的便雅憫人及猶大人
16 閣有便雅憫人及猶大人來大闢的要塞。
17 大闢出去迎接𪜶，對𪜶講：「恁若好意來欲幫贊我，我歡迎恁及我聯盟；毋拘恁若欲將我此個無罪的人出賣互對敵，願咱列祖的上帝監察責罰。」
18 彼時上帝的神臨到眾軍官的首領亞瑪賽，伊就講：
「大闢啊，阮是歸順你的；
耶西的子啊，阮是支持你的。
願你平安順利，
願幫贊你的嘛攏平安；
因為你的上帝幫贊你。」
大闢就接納𪜶，設立𪜶做游擊隊的隊長。
跟隨大闢的瑪拿西人
19 大闢及非利士人做夥欲攻擊掃羅的時，有一寡瑪拿西人來歸順伊。後來𪜶無幫贊非利士人，因為非利士的領袖有參詳，叫大闢倒去，講：「伊真有可能提咱的頭殼去歸順伊的主人掃羅。」
20 大闢去洗革拉的時，有瑪拿西人的指揮官，押拿、約撒拔、耶疊、米迦勒、約撒拔、以利戶、洗勒太，攏來歸順伊。
21 諸個人幫贊大闢對抗游擊隊，𪜶攏是勇猛的戰士，閣做軍官。
22 彼時，逐日有人來欲幫贊大闢，伊的軍隊就親像上帝的軍隊赫呢強大。
大闢的軍隊
23 有武裝好勢的戰士來希伯崙見大闢，欲照上主的話將掃羅的王位交互伊。下面是許個戰士的數目：
24 猶大支族：夯盾牌，攑槍的武裝戰士，有六千八百人。
25 西緬支族：會出戰的勇士，有七千一百人。
26 利未支族：四千六百人；
27 亞倫後代的族長耶何耶大及隨伊的有三千七百人；
28 勇猛的戰士少年人撒督及伊家族的領袖二十二人。
29 便雅憫支族：掃羅的親族有三千人；前到今，𪜶大部分擁護掃羅家。
30 以法蓮支族：出名的勇猛戰士，有兩萬空八百人。
31 約旦河西旁的瑪拿西半支族：有記錄佇家譜的，一萬八千人，攏擁護大闢作王。
32 以薩迦支族：有智識，識時勢，知以色列佇什麼時著做什麼的領袖有兩百人；𪜶的親族攏聽𪜶的命令。
33 西布倫支族：會用逐種軍器出陣交戰，真有紀律，對大闢忠誠的有五萬人。
34 拿弗他利支族：有一千個領袖；攑槍，夯盾牌隨𪜶的，有三萬七千人。
35 但支族：會出戰的，有兩萬八千六百人。
36 亞設支族：會出陣交戰的，有四萬人。
37 佇約旦河東旁，呂便支族、迦得支族、瑪拿西半支族：攑逐種軍器交戰的，有十二萬人。
38 諸個戰士攏隨時會當出戰，對大闢忠誠。𪜶來到希伯崙擁護大闢做以色列全國的王；其他的以色列人嘛同心擁護大闢作王。
39 𪜶佇遐及大闢做夥三日，亦食亦飲，因為𪜶的親族攏給𪜶備辦好勢。
40 𪜶附近的人，甚至對以薩迦、西布倫、拿弗他利來的人，攏用驢、駱駝、騾、牛，載食物，有麵粉、無花果乾丸、葡萄乾丸、酒、油，閣帶牛羊來遐，逐項攏真多；因為佇以色列中有大歡喜。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。