上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
4
該隱及亞伯
彼個人及伊的某夏娃同房，夏娃就懷孕生該隱，講：「我對上主的幫贊得著一個後生。」
2 後來夏娃閣生該隱的小弟亞伯。亞伯是顧羊的，該隱是作穡的。
3 過一段時間，該隱提一寡土地的出產獻互上主。
4 亞伯嘛將羊群中頭上生閣肥的羊獻互上主。上主意愛亞伯及伊的禮物，
5 毋拘無合意該隱及伊的禮物。該隱就真受氣，變面。
6 上主對該隱講：「你是啲受氣什麼？你是按怎變面？
7 你若行為正直，豈毋是會得著接納？若無，罪佇門口當等你；伊欲控制你，你著給伊制伏。」
8 該隱對伊的小弟亞伯講：「咱來去野地。」佇野地的時，該隱攻擊伊的小弟，給伊刣死。
9 上主對該隱講：「你的小弟亞伯佇叨位？」
伊講：「我毋知。我豈是啲顧守我的小弟的人？」
10 上主講：「你哪會做此款代誌？恁小弟的血對地裡對我哀叫。
11 你刣死恁小弟，地開嘴接受伊的血。今你欲對土地受咒詛。
12 你種作，𣍐當得著收成；你欲佇地上流離失所。」
13 該隱對上主講：「我的刑罰傷重，我擔當𣍐起。
14 你今仔日趕我離開此個地，𣍐當閣見你的面；我四界飄流，抵著我的會給我刣死。」
15 上主對伊講：「既然按呢，刣死該隱的，會受七倍的報應。」上主就給該隱做一個記號，才免抵著伊的人給伊刣死。
16 該隱就離開上主，去住佇伊甸的東旁挪得的地區。
該隱的後代
17 該隱及伊的某同房；伊的某懷孕生以諾。後來該隱起一座城，用伊的子的名給彼座城號名叫做以諾。
18 以諾生以拿，以拿生米戶雅利，米戶雅利生瑪土撒利，瑪土撒利生拉麥。
19 拉麥娶兩個某；一個叫做亞大，一個叫做洗拉。
20 亞大生雅八，是游牧民族的祖先。
21 伊的小弟猶八，是彈琴歕簫的人的祖先。
22 洗拉生土八‧該隱，是製造銅、鐵逐款器具的人的祖先；土八‧該隱的小妹是拿瑪。
23 拉麥對伊兩個某講：
亞大及洗拉，聽我講；
拉麥的某，著細膩聽：
人傷我，我欲刣伊；
少年人害我，我欲互伊死。
24 刣該隱的報應若是七倍，
刣死拉麥的報應一定七十七倍。
塞特及以挪士
25 亞當閣及伊的某同房；伊的某生子，給伊號名叫做塞特；因為伊講：「上帝閣賜我一個子，來代替互該隱刣死的亞伯。」
26 塞特後來嘛生子，給伊號名叫做以挪士；彼時人才開始求叫上主的名。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。