上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
25
耶路撒冷淪陷
( 代下 36:13-21 耶 52:3-11 )
西底家統治第九年，十月初十，巴比倫王尼布甲尼撒導伊的大軍來攻擊耶路撒冷，佇城的對面紮營，閣佇四圍作土堆攻城。
2 城受圍困，一直到西底家王第十一年。
3 四月初九，城內飢荒真嚴重，住民攏無物通食，
4 城受攻破；所有的兵士透暝對王宮花園附近，兩個城牆中間的門彼條路逃走。巴比倫軍隊猶佇四圍攻城的時，王向亞拉巴的方向逃走。
5 巴比倫的軍兵追趇西底家王，佇耶利哥的平原趇著伊；伊的全軍攏棄拺伊四散。
6 巴比倫的軍兵掠著西底家，給伊掠去佇利比拉的巴比倫王遐，佇遐受審判。
7 𪜶刣死西底家的子，互伊親目看著，閣挖伊兩蕊目睭，用銅鍊給伊鍊啲，帶去巴比倫。
聖殿受毀壞
8 ( 耶 52:12-33 )
巴比倫王尼布甲尼撒第十九年，五月初七，巴比倫王的人臣侍衛長尼布撒拉旦進入耶路撒冷，
9 用火燒上主的聖殿、王宮，及耶路撒冷所有的厝，以及所有貴族的厝。
10 所有隨侍衛長的巴比倫軍兵，將耶路撒冷四圍的城牆攏拆毀。
11 彼時，侍衛長尼布撒拉旦將留佇城內所賰的人民，及投降巴比倫王的人，以及所賰的人攏掠去。
12 毋拘侍衛長有留一寡上喪鄉的，互𪜶佇葡萄園及田園種作。
13 巴比倫人將上主殿內的銅柱、盆座，及銅海攏拍破，將許個銅運去巴比倫。
14 𪜶嘛將鼎、托仔、燈心的剪刀、囥香的𥐵仔，及聖殿所有銅的器具攏搬去；
15 囥火炭的盆、盤、所有金器的金、銀器的銀，侍衛長攏提去。
16 閣將所羅門王為上主的殿所造兩支柱、一個銅海，及許個盆座帶去；諸個器具的銅多甲𣍐秤得。
17 此兩支柱像款，每一支高八公尺，頂面有銅的柱斗；柱斗高一公尺三十公分；柱斗的周圍有銅做的網仔及石榴。
猶大人民受掠去巴比倫
18 ( 耶 52:24-27 )
侍衛長尼布撒拉旦掠大祭司西萊雅、副祭司西番雅，及三個聖殿門口的守衛；
19 閣對城內掠一個管兵的官員、王的五個親信，及徵募兵士的副指揮官，以及佇城內抵著的六十個國民。
20 侍衛長將諸個人帶去佇利比拉的巴比倫王遐。
21 巴比倫王佇哈馬地區的利比拉攏給𪜶刣死。
按呢，猶大的人民受掠離開𪜶本地。
猶大總督基大利
22 ( 耶 40:7-9 41:1-3 )
巴比倫王尼布甲尼撒設立沙番的孫，亞希甘的子基大利做總督，治理無互尼布甲尼撒王掠去，留佇猶大所賰的人民。
23 眾軍官及屬𪜶的兵士，聽見巴比倫王設立基大利管轄𪜶，尼探雅的子以實瑪利、加利亞的子約哈難、尼陀法人單戶默的子西萊雅、瑪迦人的子雅撒尼亞，及屬𪜶的兵士，就攏來米斯巴見基大利。
24 基大利對𪜶及屬𪜶的兵士咒誓，講：「恁毋免驚巴比倫的官員；恁通安心住佇此塊土地，服事巴比倫王，恁就會平安無事。」
25 彼年的七月，王親以利沙瑪的孫，尼探雅的子以實瑪利，導十個人來米斯巴，刣死基大利，閣刣死及伊做夥的猶大人及巴比倫人。
26 對按呢，所有的人無論大細，及許個軍官，因為驚巴比倫人就攏逃走去埃及。
約雅斤受解放
27 ( 耶 52:31-34 )
巴比倫王以未‧米羅達佇伊坐位彼年，就是猶大王約雅斤受掠了後第三十七年，十二月二十七日，特赦猶大王約雅斤，放伊出監，
28 閣用好話安慰伊，互伊比受掠佇巴比倫其他國家的王有較高的地位。
29 約雅斤褪去監內所穿的衫，一世人及巴比倫王做夥食。
30 約雅斤活啲的時，巴比倫王賞賜伊所需要的生活費用。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。