上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
20
希西家王破病及復原
( 賽 38:1-8, 21-22 代下 32:24-26 )
彼個時陣，希西家破病，病甲啲欲死。亞摩斯的子先知以賽亞來見伊，講：「上主按呢講：『你的後事著交代好勢，因為你會死，病𣍐好。』」
2 希西家就越轉身向壁，對上主祈禱講：
3 「上主啊，求你帶念我按怎忠誠盡心服事你，做你看做好的事。」希西家就大聲啼哭。
4 以賽亞出去，猶未到中埕，上主的話臨到伊，講：
5 「你越倒轉，對我子民的王希西家講：『上主 — 你的祖先大闢的上帝按呢講：我有聽著你的祈禱，有看著你的目屎。看啊，我欲給你醫好；第三日，你會上去上主的殿。
6 我欲互你的歲壽加添十五年。我欲解救你及此個城脫離亞述王的手；我為著家己的緣故，嘛為著我的僕人大闢的緣故，會保護此個城。』」
7 以賽亞講：「著提一塊無花果藥膏來。」𪜶就提來給貼佇粒仔，王就好起來。
8 希西家問以賽亞講：「上主欲醫好我；第三日，我會上去上主的殿，有什麼兆頭？」
9 以賽亞講：「上主欲實現伊所講的代誌，這就是上主互你的兆頭；你欲愛日規的日影進前十度，抑是倒退十度？」
10 希西家應講：「日影進前十度較簡單；我愛日影倒退十度。」
11 先知以賽亞求叫上主，伊就互亞哈斯所造日規的日影倒退十度。
巴比倫來的使者
12 ( 賽 39:1-8 )
彼時，巴拉但的子巴比倫王米羅達‧巴拉但聽著希西家破病，就差使者提批及禮物去探訪希西家。
13 希西家順使者的要求，將伊的財寶庫內面的金、銀、香料、貴氣的油，及伊所有的軍器，以及府庫內的一切攏互𪜶看。伊的王宮及全國所有的物件無一項無互𪜶看
14 然後先知以賽亞來見希西家王，問伊講：「諸個人對你講什麼？𪜶對叨位來見你？」
希西家講：「𪜶對一個真遠的國家巴比倫來探我。」
15 以賽亞講：「𪜶佇你的王宮有看著什麼？」
希西家回答：「𪜶有看著我王宮內逐項物。我所有的財寶無一項無互𪜶看。」
16 以賽亞給希西家講：「著聽上主的話：
17 日子啲欲到，王宮內一切你的祖先積聚到今仔日的物件，攏會互人搬去巴比倫，無留甲半項。上主按呢宣告。
18 閣你親生的子孫，有的會互人掠去巴比倫王的王宮做太監。」
19 希西家心內想講「我在生的時有太平安全就好」，就對以賽亞講：「你所傳達上主的話真好。」
希西家死
20 ( 代下 32:32-33 )
希西家其他的事蹟及成就，以及伊按怎掘池開溝，引水入城，攏記載佇《猶大列王史》。
21 希西家轉去伊的列祖遐，伊的子瑪拿西續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。